Մոլդովայի խորհրդարանը վերջնական ընթերցմամբ հաստատել է հանրապետության 2025 թվականի պետական բյուջեն՝ գրեթե 760 միլիոն դոլարի պակասուրդով, հայտարարել է օրենսդիր ժողովի խոսնակ Իգոր Գրոսուն։
«2025 թվականի պետական բյուջեի նախագիծը երրորդ ընթերցմամբ հավանության է արժանացել 57 պատգամավորների ձայներով»,- նիստում ասել է Գրոսուն։
Փաստաթղթի համաձայն՝ նախատեսված եկամուտները կկազմեն 3,9 մլրդ դոլար, ծախսերը՝ 4,6 մլրդ դոլար։ Սա նշանակում է, որ բյուջեի դեֆիցիտը կանխատեսվում է մոտ 760 մլն դոլար։
Մոլդովան 2021 թվականից տնտեսական ճգնաժամ է ապրում, որը սրվում է գնաճի և էներգակիրների գների աճով, ինչպես նաև վաճառքի շուկաների վերակողմնորոշմամբ՝ ԱՊՀ երկրներ մատակարարման ավանդական ուղիների անհասանելիության պատճառով։
2022 թվականին գնաճը հասել է ռեկորդային 30,2 տոկոսի, իսկ գազի սակագինը աճել է գրեթե յոթ անգամ, էլեկտրաէներգիայի համար՝ մոտ չորս անգամ։ 2023 թվականին գնաճը կազմել է 13,4%։
