Ռուսաստանցի զինվորականները զանգվածային հարվածներ են հասցրել ուկրաինական կարևոր վառելիքային և էներգետիկ ենթակառուցվածքներին՝ ի պատասխան Ուկրաինայի զինված ուժերի կողմից ATACMS հրթիռներով Տագանրոգի ռազմական օդանավակայանի վրա հարձակման, այս մասին հայտնել է Ռուսաստանի պաշտպանության նախարարությունը։
«Ի պատասխան ամերիկյան հեռահար սպառազինությունների կիրառման՝ Ռուսաստանի Դաշնության զինված ուժերը բարձր ճշգրտության հեռահար օդային և ծովային բազավորման միջոցներով, հարվածային անօդաչու թռչող սարքերով զանգվածային հարված են հասցրել Ուկրաինայի կարևոր վառելիքային և էներգետիկ ենթակառուցվածքի օբյեկտներին, որոնք ապահովում են ռազմարդյունաբերական համալիրի գործունեությունը», - հայտնել է գերատեսչությունը։
Ռուսաստանի ՊՆ-ն հավելել է, որ հարվածները հասել են իրենց նպատակին, բոլոր օբյեկտները խոցվել են։Ուկրաինայի նախագահ Վոլոդիմիր Զելենսկին հայտնել է, որ Ռուսաստանն արձակել է 93 հրթիռ և գրեթե 200 ԱԹՍ, ինչը դարձել է երկրի էներգետիկ ոլորտի վրա ամենամասշտաբային հարձակումներից մեկը։
«Մեզ հաջողվել է խոցել 81 հրթիռ, որոնցից 11 թևավոր հրթիռները խոցվել են մեր F-16-երի շնորհիվ», - ասել է Զելենսկին՝ արևմտյան դաշնակիցներին կրկին կոչ անելով Ուկրաինային տրամադրել ժամանակակից ՀՕՊ համակարգեր, մասնավորապես՝ Patriot-ներ։ Ուկրաինայում ռուսական հարվածների հետևանքով հոսանքազրկումներ են տեղի ունեցել։
«Ուկրէներգո»-ն հայտնել է, որ էլեկտրաէներգիայի սպառման սահմանափակումներն ավելացել են։ ՌԴ ՊՆ-ի տվյալներով՝ դեկտեմբերի 11-ին Ուկրաինայի զինված ուժերը 6 ATACMS հրթիռներով հարված են հասցրել Ռոստովի մարզի Տագանրոգի ռազմական օդանավակայանին, ինչի հետևանքով անձնակազմի շրջանում կան տուժածներ։ Մոսկվան խոստացել էր պատասխանել այս հարձակմանը։
