ԱՄՆ-ի և Ճապոնիայի զինված ուժերը մտադիր են դեկտեմբերին Թայվանում ռազմական ճգնաժամի դեպքում մշակել համատեղ գործողությունների առաջին պլանը, որը կներառի, մասնավորապես, ամերիկյան հրթիռային ուժերի տեղակայումը հարակից Ֆիլիպիններում և ճապոնական կղզիների հարավ-արևմուտքում: Այնտեղ կտեղակայվեն հատուկ հենակետեր, հայտնում է Kyodo գործակալությունը՝ հղում անելով աղբյուրներին։
Գործակալությունը ընդգծում է, որ Թայվանի ճգնաժամի դեպքում այդ ամբողջ հսկայական տարածքը վերածվելու է պատերազմի թատերաբեմի։
Աղբյուրների համաձայն՝ ԱՄՆ ծովային հետևակի ափամերձ գնդի առանձին ստորաբաժանումներ, որոնք հագեցած են, մասնավորապես, HIMARS բազմակի հրթիռային համակարգերով, լայնորեն կտեղակայվեն ճապոնական Կյուսյու կղզու Կագոսիմա պրեֆեկտուրայի և Օկինավա պրեֆեկտուրայի հարավ-արևմուտքում գտնվող կղզիներում: Ճապոնիայի զինված ուժերը նրանց նյութատեխնիկական աջակցություն կցուցաբերեն՝ տրամադրելով զինամթերք և վառելիք։
Ֆիլիպինների հյուսիսում զուգահեռաբար կտեղակայվեն ամերիկյան հրթիռային ստորաբաժանումներ, տիեզերական կապի և ուղղորդման, կիբեր և էլեկտրոնային պատերազմի խմբեր։ Ապրիլից այնտեղ տեղակայվել են Typhon ցամաքային շարժական կայանքներ, որոնցով կարող են արձակել Tomahawk հեռահար թևավոր հրթիռներ և SM-6 բազմաֆունկցիոնալ հրթիռներ։ Դրանք կարող են օգտագործվել ցամաքում թիրախները խոցելու, ինչպես նաև օդային, այդ թվում՝ բալիստիկ թիրախները ոչնչացնելու համար։
Վաշինգտոնը և Մանիլան 2023 թվականի փետրվարին պայմանավորվել են Ֆիլիպիններում ևս չորս ռազմական օբյեկտ տալ ԱՄՆ Զինված ուժերի տնօրինմանը: Այժմ նրանք երկրում ունեն ընդհանուր ինը հենակետ: Օբյեկտների նման ցանցը, ճգնաժամի դեպքում, կհամալրվի տարածաշրջանում ԱՄՆ ռազմածովային ուժերի ավիակիրների հարվածային խմբերի տեղակայմամբ։ Այս ամենը կոչված է ամերիկա-ճապոնական խմբին ապահովելու ուժերի գերազանցություն ծովում և օդում, պնդում է Kyodo-ն։
