ՀՀ ԱԺ պետական-իրավական հարցերի մշտական հանձնաժողովի նախագահի տեղակալ Արուսյակ Ջուլհակյանը նոյեմբերի 7-ին հանդիպել է Միջազգային քրեական դատարանի ներկայացուցիչ Դանյա Չայկելի և Միջազգային քրեական դատարանի կոալիցիայի փաստաբանության գծով տնօրեն Վիրջինի Ամատոյի հետ:
Այդ մասին հայտնում են ԱԺ-ից:
Արուսյակ Ջուլհակյանը ներկայացրել է Միջազգային քրեական դատարանի կանոնադրության վավերացումից հետո Հայաստանում կատարված աշխատանքները: Նա տեղեկացրել է, որ ՀՀ վարչապետի որոշմամբ սահմանվել են համապատասխան գործողությունների, միջոցառումների ծրագիր և ժամանակացույց: Հանձնաժողովի նախագահի տեղակալը նշել է, որ արդեն շրջանառության մեջ է դրվել «Միջազգային քրեական դատարանի հետ ՀՀ համագործակցության մասին» օրենքի նախագիծը:
Քննարկվում են Քրեական, Քրեական դատավարության, Քրեակատարողական օրենսգրքերում նախատեսվող փոփոխությունները:Հանդիպման ընթացքում քննարկվել են քննիչների, դատախազների, դատավորների, քաղհասարակության կարողությունների զարգացմանն ուղղված հարցեր:
Ընդգծվել է վերապատրաստման ծրագրերի կարևորությունն ու անհրաժեշտությունը:Միջազգային քրեական դատարանի ներկայացուցիչները խոսել են քաղհասարակության հետ օրերս անցկացրած վերապատրաստման ծրագրի և արդյունքների մասին:Անդրադարձ է կատարվել Միջազգային քրեական դատարանի վերաբերյալ իրազեկվածությունը բարձրացնելուն առնչվող մի շարք հարցերի:
