Ահաբեկչական ԻՊ կազմակերպությունը հայտարարել է սիրիական Հալեպ նահանգի Մանբիջ քաղաքի շրջանում տեղի ունեցած հարձակման իր պատասխանատվության մասին, որի հետևանքով, ըստ Սիրիայի պաշտպանության նախարարության տվյալների, զոհվել է երկու զինծառայող, հայտնում է Reuters-ը։
Պատասխանատվության մասին հայտարարությունը հրապարակվել է խմբավորման Telegram-ալիքում։
Ավելի վաղ Սիրիայի պաշտպանության նախարարությունը հայտնել էր, որ Մանբիջի շրջանում երկու զինվոր է սպանվել անհայտ զինված անձանց կողմից՝ չհայտնելով լրացուցիչ մանրամասներ։
Դիտորդների տվյալներով, հարձակումը դարձել է այն հարձակումների շարքի մի մասը, որոնց պատասխանատվությունը ԻՊ-ն ստանձնել է փետրվարից ի վեր։ Այդ ժամանակ խմբավորումը հայտարարել էր Սիրիայի նախագահ Ահմեդ աշ-Շարայի կառավարության դեմ գործողությունների նոր փուլի մասին։
Իրավիճակը զարգանում է երկրի հյուսիսի և արևելքի առանձին շրջաններում սիրիական իշխանությունների վերահսկողության ընդլայնման, ինչպես նաև Սիրիայի հյուսիսարևելքում մի շարք դիրքերից ամերիկյան զորքերի աստիճանական դուրսբերման ֆոնին։
