BMW ընկերությունը սկսել է ընդունել նոր BMW i3-ի՝ ամբողջովին էլեկտրական 3-րդ սերիայի առաջին սեդանի պատվերները, այն կվաճառվի համաշխարհային շուկայում, հայտնել է Autocar-ը։
Նորույթը բացում է Neue Klasse-ի նոր դարաշրջանը և դառնում է նոր էլեկտրական պլատֆորմի վրա հիմնված երկրորդ սերիական ավտոմեքենան՝ iX3 քրոսովերից հետո։
Մոդելի մեկնարկային գինը Մեծ Բրիտանիայում կազմում է 53 005 ֆունտ սթեռլինգ, ինչը համարժեք է 72 000 ԱՄՆ դոլարին։ Սա զգալիորեն ավելի թանկ է ներկայիս բենզինային և լիցքավորվող հիբրիդային 3-րդ սերիայի տարբերակներից, սակայն ավելի էժան է նոր էլեկտրական մրցակցից՝ Mercedes-Benz C-Class Electric-ից, որի գինը սկսվում է մոտ 79 000 դոլարից։
Չնայած BMW-ն 2021 թվականից արտադրում է էլեկտրական i4-ը, ընկերությունը գիտակցաբար հետաձգում էր ամբողջովին էլեկտրական 3-րդ սերիայի թողարկումը, մինչև տեխնոլոգիաները թույլ տվեցին ապահովել ներքին այրման շարժիչներով ավտոմեքենաների հետ համադրելի բնութագրեր։
Նոր i3-ի հիմքում ընկած է վեցերորդ սերնդի էլեկտրական հարթակ՝ 800 վոլտանոց ճարտարապետությամբ։ Ավտոմեքենան ունի է 108 կՎտ/ժ տարողությամբ մարտկոց՝ նիկել-մանգան-կոբալտային տարրերով։
Նորույթի գլխավոր առանձնահատկությունը դարձել է տպավորիչ ընթացքի պաշարը՝ մինչև 912 կիլոմետր մեկ լիցքավորմամբ։ Բրիտանական շուկայում ներկայացված էլեկտրական մեքենաների շարքում ավելին կկարողանա անցնել միայն թարմացված Mercedes-Benz EQS-ը՝ հայտարարված մոտ 925 կիլոմետր ընթացքի պաշարով։
Հետաքրքիր է, որ i3-ն օգտագործում է նույն մարտկոցը, ինչ iX3 քրոսովերը, սակայն սեդանի ավելի սահուն թափքի շնորհիվ կարող է անցնել մոտ 108 կիլոմետր ավելի հեռու։
Երբ մարտկոցը լիցքաթափվում է, ավտոմեքենան կարելի է արագ լիցքավորել մինչև 400 կՎտ հզորությամբ հաստատուն հոսանքի լիցքավորման շնորհիվ։ Տասը րոպե լիցքավորմամբ ընթացքի պաշարն ավելանում է մոտ 400 կիլոմետրով։ Փոփոխական հոսանքով լիցքավորումն աջակցվում է մինչև 22 կՎտ հզորությամբ։
Շարժման համար պատասխանատու են երկու էլեկտրաշարժիչներ։ Հետևում տեղադրված է 322 ձիաուժ հզորությամբ սինքրոն շարժիչ, իսկ առջևում՝ 165 ձիաուժ հզորությամբ ասինքրոն շարժիչ։ Համակարգի ընդհանուր հզորությունը կազմում է 463 ձիաուժ, իսկ պտտող պահը հասնում է 645 Н·м-ի։
Թեև BMW-ն դեռ չի բացահայտում մինչև 100 կմ/ժ արագացման պաշտոնական ժամանակը, սպասվում է, որ մոտ 2,3 տոննա քաշ ունեցող ծանր սեդանը կկարողանա այս վարժությունը կատարել մոտ չորս վայրկյանում։
Վաճառքի մեկնարկի պահին հասանելի կլինի լիաքարշակ i3 50 xDrive տարբերակը, սակայն ապագայում շարքը կընդլայնվի։ Արդեն հայտնի է, որ ավելի ուշ կհայտնվի Touring ունիվերսալը, իսկ 2028 թվականին սպասվում է բարձր արտադրողականությամբ էլեկտրական M3 տարբերակը, որը, BMW-ի խոսքով, պետք է նոր չափանիշներ սահմանի սպորտային էլեկտրական մեքենաների հատվածում։
Նոր i3-ի չափերն էլ են մեծացել։ Ավտոմեքենայի երկարությունը կազմում է 4,76 մետր, լայնությունը՝ 1,87 մետր, իսկ բարձրությունը՝ 1,48 մետր՝ բոլոր հիմնական ցուցանիշներով գերազանցելով ներկայիս բենզինային 3-րդ սերիային։
Մոդելի արտաքին տեսքը կատարված է Neue Klasse-ի նոր կորպորատիվ ոճով։ Առջևի մասն ունի բրենդային «ռունգերի» և լուսարձակների միավորված բլոկ, ինչը նկատելիորեն տարբերում է ավտոմեքենան ներկա սերնդից։
Ամբողջությամբ վերամշակվել է նաև սրահը։ Կենտրոնական տեղը զբաղեցնում է նոր սերնդի մուլտիմեդիա համակարգի 17,9-դյույմանոց սենսորային էկրանը։ Ավանդական գործիքային վահանակը վերացել է․ այն փոխարինվել է 43,3 դյույմ երկարությամբ հսկայական Panoramic iDrive դիսփլեյով, որը ձգվում է գրեթե ամբողջ առջևի վահանակով՝ դիմապակու տակ։
Նոր BMW i3-ի արտադրությունը կկազմակերպվի ընկերության Մյունխենի գլխավոր գործարանում։
