Պլեխանովի անվան ռուսական տնտեսագիտական համալսարանի Երևանի մասնաճյուղում տեղի ունեցավ Հայրենական մեծ պատերազմում տարած հաղթանակի օրվան նվիրված տոնական միջոցառում: Մասնաճյուղի ուսանողների կողմից կազմակերպված միջոցառումը ևս մեկ անգամ հիշեցրեց ֆաշիզմը հաղթածների հերոսության մասին:
Մասնաճյուղի տնօրեն, պատմական գիտությունների թեկնածու, Ռուսաստանի Դաշնության կրթության պատվավոր աշխատող Թամարա Ռազմիկովնա Վարդանյանը հանդես եկավ հանդիսավոր խոսքով: Նա ընդգծեց Հաղթանակի հատուկ նշանակությունը ինչպես ամբողջ աշխարհի, այնպես էլ հայ ժողովրդի համար:
«Եթե ֆաշիզմը հաղթեր, ոչ միայն Խորհրդային Միությունը կդադարեր գոյություն ունենալուց, այլև Հայաստան չէր լինի: Խորհրդային Հայաստանի սահմաններին կանգնած էր թուրքական բանակը, և հենց Ստալինգրադի ճակատամարտում տարած հաղթանակն էր, որ կանխեց նրա մուտքը պատերազմի մեջ: Կարևոր է, որ ուսանողները իմանան և հիշեն սա: Հաղթանակի համար խորհրդային ժողովրուրդը բարձր գին վճարեց, որը պահանջեց հսկայական ջանքեր և կորուստներ, և մենք պարտավոր ենք պահպանել այս հիշողությունը», - նշեց Թամարա Ռազմիկովնան:
Մասնաճյուղի ուսանողները պատրաստել էին հուզիչ ելույթներ՝ Հաղթանակի երգերը, որոնք տասնամյակներ անց շարունակում են սրտեր հուզել, ինչպես նաև ավանդական վալսը՝ սիրո, մարդկայնության և չարիքի նկատմամբ բարության հաղթանակի խորհրդանիշը։
Միջոցառումը փայլուն կերպով եզրափակեց հայրենասիրական ներկայացումը՝ դհոլի նվագակցությամբ և հայկական ժողովրդական պարով։
Միջոցառմանը մասնակից ուսանողների հիմնական ուղերձն էր՝ «Քանի դեռ հիշում ենք, սխրանքն անմահ է»։ Եվ քանի դեռ Հաղթանակի հիշատակը, ժողովրդի քաջությունն ու հերոսությունը կենդանի են, պատմությունը չի կարող ջնջվել կամ մոռացվել։
