Մոսկվայի «Սպարտակի» և «Դինամոյի» նախկին պաշտպան, հայտնի ֆուտբոլային փորձագետ Ալեքսանդր Բուբնովը «Коммент.Шоу»-ի եթերում գնահատականներ է դրել «Կրասնոդարի» ֆուտբոլիստներին՝ Ռուսաստանի Պրեմիեր լիգայի 24-րդ տուրի «Զենիթի» դեմ խաղի (1:1) համար։
Ըստ Բուբնովի հաշվարկների՝ Մուրադ Մուսաևի սաները հանդիպման ընթացքում ընդհանուր առմամբ կատարել են 827 տեխնիկատակտիկական գործողություն՝ թույլ տալով 22% խոտան։ Թիմային այս ցուցանիշի համար «Կրասնոդարն» արժանացել է «հինգ» գնահատականի։
Սակայն փորձագետը խիստ է գտնվել թիմի ավագի նկատմամբ. նա «երկու մինուսով» է գնահատել Հայաստանի ազգային հավաքականի կիսապաշտպան Էդուարդ Սպերցյանի խաղը։ Նշվում է, որ հայ ֆուտբոլիստը կատարել է ընդամենը 72 տեխնիկատակտիկական գործողություն, ընդ որում՝ խոտանը կազմել է 43%։
Ռուսաստանի առաջնության 24 տուրերից հետո «Կրասնոդարը» վաստակել է 53 միավոր և զբաղեցնում է մրցաշարային աղյուսակի առաջին հորիզոնականը։
