Այսօր՝ ապրիլի 4-ին, խոշոր ավտովթար է տեղի ունեցել Կոտայքի մարզում։
Ժամը 15:00-ի սահմաններում «Kia Forte» մակնիշի ավտոմեքենան Երևան-Սևան-Իջևան ավտոճանապարհի «Չայնիի» ոլորանների սկզբնամասում դուրս է եկել երթևեկելի գոտուց, բախվել երկաթե արգելապատնեշներին և մոտ 100 մետր մի քանի պտույտ շրջվելով՝ կողաշրջված հայտնվել ձորում՝ ապառաժ քարերի վրա։
Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով բարեբախտաբար տուժածներ չկան։Վարորդը և 2 ուղևորները, որոնցից մեկն անչափահաս է, հրաշքով են փրկվել և ավտոմեքենայից դուրս չեն հայտնվել, քանի որ եղել են ամրակապված և հենց ամրագոտին է նրանց կյանքը փրկել։
Ֆոտոլրագրողի տեղեկություններով՝ վարորդը ենթարկվել է սթափության փորձաքննության, եղել է սթափ։
