Ռուսաստանի և Կուբայի համագործակցությունը ուղղված չէ երրորդ երկրների դեմ, և Մոսկվան կշարունակի այն զարգացնել՝ երկու երկրների ժողովուրդների բարօրության, ինչպես նաև միջազգային անվտանգության ու կայունության ամրապնդման համար, հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան։
«Ռուսաստանն ու Կուբան ունեն յուրահատուկ պատմական կապեր։ Մեր բազմակողմ համագործակցության ավանդույթները խոր արմատներ ունեն և լայն հասարակական-քաղաքական աջակցություն են վայելում երկու երկրներում։ Միևնույն ժամանակ, ինչպես մենք բազմիցս ընդգծել ենք, այս համագործակցությունը ուղղված չէ երրորդ կողմերի դեմ և չի կարող դիտարկվել ինչ-որ մեկի շահերին վնաս հասցնելու ձևով։
Մենք պատրաստ ենք այն շարունակաբար զարգացնել մեր պետությունների ժողովուրդների բարօրության, ինչպես նաև միջազգային անվտանգության ու կայունության ամրապնդման համար», — նշվում է Մարիա Զախարովայի խոսքում, որը հրապարակվել է ՌԴ ԱԳՆ կայքում։
Հինգշաբթի ԱՄՆ նախագահ Դոնալդ Թրամփը ստորագրել է հրամանագիր, ըստ որի ԱՄՆ-ը կարող է ներմուծման մաքսատուրք սահմանել այն երկրների արտադրանքի վրա, որոնք վաճառում կամ մատակարարում են նավթ Կուբային։
