Վենեսուելայի նախագահի լիազոր ներկայացուցիչ Դելսի Ռոդրիգեսը հայտարարել է բոլոր քաղբանտարկյալների համընդհանուր համաներում անցկացնելու որոշման մասին։
«Ես ցանկանում եմ հայտարարել համընդհանուր համաներման մասին օրենքի առաջմղման որոշման մասին, որը կընդգրկի քաղաքական բռնության ամբողջ ժամանակահատվածը՝ 1999 թվականից մինչև մեր օրերը»,-հայտարարել է Ռոդրիգեսը Վենեսուելայի Գերագույն դատարանում 2026 թվականի դատական գործունեության բացման հանդիսավոր արարողության ժամանակ, որը հեռարձակվել է Venezolana de Televisión հեռուստաալիքով։
Նախագահի լիազոր ներկայացուցիչը հանձնարարել է դատական բարեփոխումների հանձնաժողովին և ժողովրդավարական համակեցության ու խաղաղության ծրագրին մոտ ժամանակներս Ազգային ժողովի (խորհրդարանի) քննարկմանը ներկայացնել համընդհանուր համաներման մասին օրենքի նախագիծը։
Նա դիմել է օրենսդիրներին՝ կոչ անելով «առավելագույն համագործակցության, որպեսզի օրենքը օգնի բուժել քաղաքական հակամարտության, բռնության և ծայրահեղականության պատճառած վերքերը և վերականգնի արդարությունը երկրում»։
