Միացյալ Նահանգները փաստացի դադարեցրել է Ուկրաինային նախկինում խոստացված մոտ 250 միլիոն դոլարի էներգետիկ օգնության հատկացումը։ Այդ մասին հաղորդում է Reuters գործակալությունը։
Հղում անելով իր աղբյուրներին՝ գործակալությունը նշում է, որ այդ միջոցները նախատեսված էին Կիևի կողմից հեղուկացված բնական գազի (LNG) ձեռքբերման և վնասված էներգետիկ ենթակառուցվածքների վերականգնման համար։
Ուկրաինային այդ միջոցների առնվազն մի մասի հատկացնելու մտադրության մասին ԱՄՆ Կոնգրեսին տեղեկացրել էր Միջազգային զարգացման գործակալությունը (USAID) դեռևս նախորդ ամերիկյան վարչակազմի օրոք՝ նախագահ Ջո Բայդենի ղեկավարությամբ։ Սակայն, ըստ հրապարակման, դա այդպես էլ չի իրականացվել։
Ինչպես նշել են երկու աղբյուրներ, այս անգամ էներգետիկ օգնության տրամադրման հետաձգումը, ըստ երևույթին, պայմանավորված է բյուրոկրատական խառնաշփոթով և ԱՄՆ դաշնային կառավարության ներսում առկա ներքին տարաձայնություններով, այլ ոչ թե Ուկրաինայի վրա ճնշում գործադրելու փորձով։
