Ուկրաինան ԱՄՆ-ից չի ստացել «Patriot» համակարգերի համար նախատեսված հերթական հակաօդային պաշտպանության հրթիռների խմբաքանակը, քանի որ մատակարարումը եվրոպական երկրների կողմից չի վճարվել PURL ծրագրի շրջանակում։ Այդ մասին լրագրողներին հայտնել է Ուկրաինայի նախագահ Վլադիմիր Զելենսկին։ Նրա խոսքերը փոխանցում է «24 ալիք»-ը։
«ԱՄՆ-ը մեզ հրթիռներ անվճար չի տրամադրում։ Դրան կարելի է տարբեր կերպ վերաբերվել։ Դրանք վճարում է Եվրոպան։ PURL ծրագրով տրանշը չի վճարվել, և հրթիռները չեն մատակարարվել», — ասել է նա։
Զելենսկին հավելել է, որ վերջին շրջանում եղել են իրավիճակներ, երբ Ուկրաինան ընդհանրապես չի ունեցել հակաօդային պաշտպանության հրթիռներ։
PURL ծրագիրը մեկնարկել է 2025 թվականի հուլիսի 14-ին՝ ԱՄՆ նախագահ Դոնալդ Թրամփի և ՆԱՏՕ-ի գլխավոր քարտուղար Մարկ Ռյուտտեի կողմից։ Այդ մեխանիզմի համաձայն՝ ՆԱՏՕ-ի դաշնակիցները Ուկրաինայի համար ձեռք են բերում սպառազինություն ԱՄՆ պահուստներից։
