Politico պարբերականը, հղում անելով անանուն դիվանագետների, պնդում է, որ Սլովակիայի վարչապետ Ռոբերտ Ֆիցոն անցած շաբաթ եվրոպացի առաջնորդների հետ հանդիպման ժամանակ մտահոգություն է հայտնել ԱՄՆ նախագահ Դոնալդ Թրամփի «հոգեբանական վիճակի» կապակցությամբ՝ Ֆլորիդայում նրա հետ հանդիպումից հետո։ Միևնույն ժամանակ, Սպիտակ տանը այդ տեղեկությունը որակել են որպես ֆեյք։
Բացի այդ, ինչպես ընդգծում է հենց պարբերականը, նման տեղեկատվություն հաղորդող դիվանագետները ներկա չեն եղել եվրոպացի առաջնորդների այդ խոսակցությանը։ Նրանք նաև նշել են, որ մանրամասներ չունեն այն մասին, թե Թրամփի խոսքերից կոնկրետ ինչը կարող էր նման արձագանք առաջացնել Ֆիցոյի մոտ։
«Ռոբերտ Ֆիցոն՝ ԵՄ այն առաջնորդներից մեկը, որը հաճախ աջակցում է Թրամփի այն տեսակետին, թե Եվրոպան թույլ է, մտահոգված է եղել ԱՄՆ նախագահի «հոգեբանական վիճակով»։ Ֆիցոն օգտագործել է «վտանգավոր» բառը՝ նկարագրելու համար այն տպավորությունը, որ ԱՄՆ նախագահը թողել է իրենց անձնական հանդիպման ժամանակ՝ Թրամփի Մար-ա-Լագո կալվածքում՝ Ֆլորիդայում»,-նշվում է հրապարակման մեջ։
