ԱՄՆ նախագահ Դոնալդ Թրամփի՝ եվրոպական պետությունների նկատմամբ մաքսատուրքեր սահմանելու քաղաքականությունը և Գրենլանդիայի վերաբերյալ նրա ծրագրերը հակասում են ՆԱՏՕ-ի կանոնադրության մի շարք հոդվածների։ Այդ կարծիքը Politico-ին հայտնել է Հյուսիսատլանտյան դաշինքի անդամ մի երկրի անանուն դիվանագետ։
Նրա խոսքով՝ Թրամփը, եվրոպական պետությունների նկատմամբ մաքսատուրքեր սահմանելու սպառնալիքներ հնչեցնելով և Գրենլանդիան գրավելու հնարավորության մասին խոսելով, խախտում է կանոնադրության երկրորդ և երրորդ հոդվածները։ Ըստ այդ հոդվածների՝ ՆԱՏՕ-ի անդամ պետությունները պետք է «ձգտեն վերացնել հակասությունները իրենց միջազգային տնտեսական քաղաքականության մեջ և նպաստեն տնտեսական համագործակցության զարգացմանը»։ Բացի այդ, նրանք պարտավոր են «պահպանել և զարգացնել իրենց անհատական և հավաքական կարողությունները՝ զինված հարձակման դեմ պայքարելու համար»։
Ինչպես նշում է Politico-ն՝ դիվանագետների և քաղաքական գործիչների հետ զրույցների հիման վրա, այս ֆոնին ՆԱՏՕ-ի ներկայիս գլխավոր քարտուղար Մարկ Ռյուտեի առաջնահերթ խնդիրն է դարձել «Թրամփի նախագահության պայմաններում ԱՄՆ-ին Եվրոպայի կողմում պահելը»։ Սակայն, ըստ պարբերականի, նման մոտեցումը Ռյուտեին խոցելի է դարձնում քննադատության համար, քանի որ նրա գործունեության մյուս ասպեկտները մղվում են երկրորդ պլան։
