Վերընտրվելուց առաջ ԱՄՆ նախագահ Դոնալդ Թրամփը տեղյակ չի եղել այն պատերազմների գոյության մասին, որոնց ավարտի մասին հայտարարել է իշխանության վերադառնալուց հետո։ Նա այս մասին հայտարարել է WABC հեռուստաալիքով հեռարձակվող «Սիդ և ընկերներ» ռադիոհաղորդմանը տված հարցազրույցում, հաղորդում է «ՌԻԱ Նովոստի»-ն։
«Ես քարոզարշավի ընթացքում չգիտեի, որ կա ութ պատերազմ։ Ես նույնիսկ չէի մտածել դրա մասին, բայց ի վերջո ավարտեցի ութ պատերազմ», - ասել է Թրամփը։
Նա նաև կարծիք է հայտնել, որ ԱՄՆ նախորդ ոչ մի նախագահի պաշտոնավարման առաջին տարում նման բան չի եղել։ Ամերիկացի առաջնորդը հավելել է, որ իր վարչակազմը, մասնավորապես, հասել է պատմության մեջ ամենամեծ հարկային և բյուրոկրատական կրճատումներին։
Հիշեցնենք՝ Դավոսի ֆորումում Թրամփը հայտարարել էր, որ ամսական միջինում լուծում է մեկ հակամարտություն։ Այն հակամարտությունները, որոնց վերջ դնելու խոստումը տվել էր, ներառում են՝ Իսրայելը և ՀԱՄԱՍ–ը, Իսրայելը և Իրանը, Հայաստանը և Ադրբեջանը, Հնդկաստանը և Պակիստանը, Սերբիան և Կոսովոն, Կոնգոյի Դեմոկրատական Հանրապետությունը և Ռուանդան, Կամբոջան և Թաիլանդը, Եգիպտոսը և Եթովպիան։ Նա նաև ծրագրում է ավարտել իններորդ պատերազմը՝ Եմենի հակամարտությունը։
ԱՄՆ նախագահը նաև բազմիցս հայտարարել է, որ մոտ է ռուս-ուկրաինական հակամարտության ավարտին։ Նախընտրական քարոզարշավի ժամանակ նա խոստացավ այն ավարտել 24 ժամվա ընթացքում։
