Թբիլիսին պատրաստ է վերականգնել ռազմավարական գործընկերությունը Վաշինգտոնի հետ և սպասում է ամերիկյան վարչակազմի որոշմանը։ Այս մասին լրագրողներին հայտնել է Վրաստանի վարչապետ Իրակլի Կոբախիձեն։
«Ձեզ հայտնի է վրաց-ամերիկյան հարաբերությունների համատեքստը։ Այդ համատեքստը շատ ծանր է, այն ձևավորվել է ԱՄՆ նախկին նախագահ Ջո Բայդենի վարչակազմի կողմից։ Տեսնենք՝ մենք համբերատար սպասում ենք։ Մենք հրապարակային հայտարարություն ենք արել այն մասին, որ պատրաստ ենք վերականգնել ԱՄՆ-ի հետ ռազմավարական գործընկերությունը՝ մաքուր էջից և հստակ ճանապարհային քարտեզով։ Սպասում ենք ամերիկյան վարչակազմի որոշմանը»,-ասել է Կոբախիձեն։
Վրաստանի և ԱՄՆ-ի հարաբերությունները զգալիորեն վատթարացել են 2024 թվականին՝ երկրում «օտարերկրյա գործակալների» մասին օրենքի ընդունումից հետո։ Անցյալ տարվա նոյեմբերի 28-ին Կոբախիձեի՝ Եվրամիությանը անդամակցելու շուրջ բանակցությունների մեկնարկի գործընթացը սառեցնելու մասին հայտարարությունից հետո ԱՄՆ Պետդեպարտամենտը դադարեցրեց հանրապետության հետ ռազմավարական գործընկերությունը։
Վրաստանի իշխանությունները դեռևս մինչև Դոնալդ Թրամփի՝ ԱՄՆ նախագահ ընտրվելը բազմիցս հայտարարել էին, որ հույսեր են կապում ԱՄՆ-ում իշխանափոխության և Վաշինգտոնի հետ հարաբերությունների վերագործարկման հետ։
