Միլիարդատեր Իլոն Մասկը վերադառնում է մեծ քաղաքականություն և պատրաստ է ֆինանսավորել հանրապետականների քարոզարշավը ԱՄՆ-ում 2026 թվականի միջանկյալ ընտրություններում, հայտնում է The Wall Street Journal-ը։
Թերթի տվյալներով՝ «աշխարհի ամենահարուստ մարդը արդեն 10 միլիոն դոլար է հատկացրել Հանրապետական կուսակցությունից Սենատի թեկնածուին, իսկ նրա լարված հարաբերությունները ԱՄՆ նախագահ Դոնալդ Թրամփի հետ սկսել են կարգավորվել»։ Նշվում է, որ վերջին շաբաթներին Մասկի քաղաքական թիմը հանդիպումներ է անցկացրել հնարավոր կապալառուների հետ՝ թվային նախագծերի և հաղորդագրությունների տարածման ուղղությամբ աշխատանքի համար։
Թերթի տեղեկությունների համաձայն՝ 2024 թվականին Մասկը գրեթե 300 միլիոն դոլար է ծախսել Թրամփին և հանրապետականներին աջակցելու համար՝ դառնալով ԱՄՆ-ում ամենախոշոր հրապարակային քաղաքական դոնորը։ Ներկայիս մերձեցումը, ըստ թերթի, դիտարկվում է որպես պրագմատիկ դաշինք, որը Մասկին թույլ է տալիս պահպանել ազդեցության ուղիղ կապը վարչակազմի հետ, իսկ Սպիտակ տանը՝ օգտվել նրա ֆինանսական ռեսուրսներից և տեխնիկական ենթակառուցվածքից։
