ԱՄՆ-ը ցանկանում է վերանայել Դանիայի հետ 1951 թվականին ստորագրված պաշտպանական համաձայնագիրը՝ նպատակ ունենալով վերացնել Գրենլանդիայում իր ռազմական ներկայության նկատմամբ ցանկացած սահմանափակում։ Այդ մասին հայտնում է Bloomberg գործակալությունը՝ հղում անելով իր աղբյուրներին։
Ինչպես նշվում է, գործող պայմանագիրը պարտավորեցնում է Վաշինգտոնին «խորհրդակցել և տեղեկացնել» Դանիային և Գրենլանդիային՝ նախքան Գրենլանդիայում ԱՄՆ-ի ռազմական գործողությունների կամ օբյեկտների մեջ որևէ էական փոփոխություն մտցնելը։ Այժմ ԱՄՆ-ը ցանկանում է վերաձևակերպել այդ դրույթները, որպեսզի Վաշինգտոնի ծրագրերը որևէ սահմանափակման չենթարկվեն։
Թե արդյոք Դանիան և Գրենլանդիան կհամաձայնեն այդ փոփոխություններին, առայժմ հայտնի չէ, նշում է Bloomberg-ը։ «Գործարքի մանրամասները կհրապարակվեն այն պահին, երբ բոլոր կողմերը դրանք համաձայնեցնեն», — գործակալությանը հայտնել է Սպիտակ տան փոխխոսնակ Աննա Քելլին։
