ԱՄՆ-ն հուսով է, որ Վրաստանի նախագահ Սալոմե Զուրաբիշվիլին կկարողանա հետաքննությանը տրամադրել խորհրդարանական ընտրությունների կեղծման ապացույցներ, ինչում նա մեղադրում է երկրի իշխանություններին, այս մասին հայտարարել է ԱՄՆ պետքարտուղարության խոսնակ Մեթյու Միլլերը։
«Որքան հասկանում եմ, նա (խմբ.՝ Վրաստանի նախագահը) ասել է, որ տեղեկատվություն ունի խախտումների մասին, ուստի հուսով եմ, որ նա կարող է տրամադրել այդ տեղեկատվությունը, որը տեղին կլինի ցանկացած հետաքննության համար, անկախ այն բանից, թե դա անցկացվում է Վրաստանի իշխանությունների, թե որևիցե այլ մեկի կողմից», - հայտարարել է Միլլերը:
Վրաստանի դատախազությունը հետաքննություն է սկսել խորհրդարանական ընտրություններում հնարավոր կեղծիքների վերաբերյալ և Զուրաբիշվիլիին հրավիրել է ցուցմունք տալու։
Սակայն ի պատասխան դրա՝ Վրաստանի նախագահը դատախազությանը կոչ է արել զբաղվել իրենց գործերով և դադարեցնել քաղաքական հաշվեհարդարն իր նկատմամբ։
Մամուլի ասուլիսում Միլլերը հիշեցրել է, որ Վաշինգտոնը վերանայում է Վրաստանի հետ հարաբերությունները և արդեն կասեցրել է Վրաստանի կառավարությանը 95 միլիոն դոլարի աջակցության տրամադրումը։ Նա նաև հիշեցրել է, որ ԱՄՆ նախագահ Ջո Բայդենը Վրաստանի կառավարությանը կոչ է արել անցկացնել ընտրություններում բոլոր խախտումների թափանցիկ հետաքննություն։
