Փառք Աստծո, այս իրավիճակում մենք Մասյացոտնի թեմում ունենք նոր առաջնորդական տեղապահ․ մեր լավագույն վարդապետներից Ռուբեն Վարդապետ Զարգարյանը երեկ նշանակվեց Մասյացոտնի թեմի առաջնորդական տեղապահ և դա ժողովրդին շատ ուրախացրեց։ Այս մասին լրագրողների հետ զորւյցում ասաց Տեր Վրթանես Բաղալյանը։
«Տեսանք՝ ինչպես իշխանությունները, վարչական ռեսուրսի կոպիտ չարաշահմամբ և ոստիկանական ուժերի անօրեն գործունեության արդյունքում, փորձում էին խոչընդոտել նորանշանակ թեմակալ առաջնորդի մուտքը առաջնորդանիստ եկեղեցի և առաջնորդարան: Եվ այս իրավիճակում տեսնում ենք, որ կան որոշ հոգևորականներ, որոնք միացել են Նիկոլ Փաշինյանի հակաեկեղեցական արշավին և, բնականաբար, նրանք միացել են ոչ կամավոր կերպով»,– ասաց Տեր Վրթանեսը՝ հավելելով, որ տիրադավ հոգևորականները միացել են Վեհափառի դեմ արշավին՝ «իրենց դեմ ունեցած կոմպրոմատների վախից»։
«Տեսնում ենք, որ այդ տիրադավ եպիսկոպոսները, որոնցից է նաև Գևորգ Սարոյանը, իրենց թեմերի քահանաների վրա բռնաճնշումներ են իրականացնում և Մայր Աթոռը փորձեց քահանաներին պաշտպանել այդ բռնաճնշումներից նաև այդ նշանակումով»,– ասաց Տեր Վրթանեսը:
Ադրադառնալով Մասյացոտնի թեմի նախկին առաջնորդ Գեւորգ եպիսկոպոս Սարոյանի պնդումներին, թե Վեհափառի կողմից ճնշումներ են եղել, և Կաթողիկոսի հրահանգով են հրապարակվել Արշակ Սրբազանին վերաբերող նյութերը, նա նշեց․
«Գևորգ Սրբազանը լուրջ կոմպլեքսներ, լուրջ խնդիրներ ունի և միշտ ինքը վատ է տրամադրված եղել Արշակ Սրբազանի նկատմամբ: Ոմանց կարծիքով իր կարճահասակ լինելու պատճառով ինքը միշտ կոմպլեքսավորված է եղել և արդեն Նիկոլ Փաշինյանին միանալուց հետո սուտ խոսելը բնական վիճակ է իր համար»։
Նրա խոսքով՝ Գևորգ եպիսկոպոս Սարոյանը, մինչև Նիկոլ Նիկոլ Փաշինյանին միանալը, «սուտ խոսելու հակվածություն չի ունեցել, բայց հիմա իր մոտ շատ բնական դրսևորում է»:
