Այսօր Դիլիջանի անտառներում, միջպետական ճանապարհի ոլորաններում ու առողջարանային հատվածում միայն ծուխ է, կրակ չկա, վստահեցնում է ՆԳ նախարարությունը՝ միաժամանակ հայտնելով, որ նույնը չի կարող ասել Գեղարքունիքի սահմանային գոտու վերաբերյալ։Համենայն դեպս 8-10 օր առաջ Ճամբարակ–Թթուջուր հատվածում բռնկված հրդեհը, որ տարածվեց արագորեն Տավուշի անտառներով մեկ՝ պատասխանատուների իներտ ջանքերի պատճառով, առայժմ ամբողջովին չի հրդեհաշիջվել, օջախներ դեռ կան։
Այդպես ենք հասկանում ՆԳՆ ոչ հստակ հաղորդագրությունից։
Չմոռանանք, սոցցանցում առաջին զարհուրելի տեսանյութից հետո Ճամբարակի փոխհամայնքապետ Ռոբերտ Օհանյանը առաջին պաշտոնյան էր, ով անկեղծորեն լրագրողի հետ զրույցում հայտնել էր, որ Ճամբարակում դեռ նոյեմբերի կեսերից են հրդեհի օջախներ հայտնաբերել՝ հակառակ ՆԳՆ պաշտոնական հաղորդագրության, որտեղ ասվում էր 21-ից տարածվող կրակի մասին։
Ընդ որում՝ Օհանյանը հստակ վարկած էր առաջ բերել՝ թշնամու տարածքից է կրակը ներթափանցել հայկական արոտավայրեր։
Ավելին, տեղական պաշտոնյան, որը արտակարգ իրավիճակում ոչ թե իր վարչական տարածքում էր ու հրդեհաշիջման աշխատանքների էր մասնակցում, այլ Երևանում էր՝ Ճամբարակի համայնքապետի հետ, և պարտադիր ներկա էր Փաշինյանի կազմակերպած պետական համակարգի աշխատուժի համաժողովին։Ինչո՞ւ այսքան լայնորեն տարածվեց կրակը և որքանով էր հնարավոր իրավիճակի բեկում շատ ավելի կարճ ժամկետում, արդյոք դանդաղե՞լ է համակարգը, և միթե՞ հնարավոր չէր կանխել հրդեհի տարածումը, որ չայրվեին այսքան ահռելի կանաչ տարածքներ։
Այս հարցին ՆԳՆ-ն յուրահատուկ բացատրություն ունի՝ ուշ են ահազանգ ստացել, դրա համար էլ ուշ են սկսել հրդեհաշիջման աշխատանքները։ ՆԳՆ-ն, փաստորեն, համարում է, որ մարզային բաժինները՝ ոստիկանությունը և ԱԻՆ-ը, անցնում են գործի, երբ հրդեհի մասին իրենց ահազանգում են։
Ստացվում է՝ առանց ահազանգի իրենք չեն տիրապետում իրավիճակին։ Թերևս դրա հետևանքով էլ անհնար է եղել օպերատիվորեն վերահսկել իրավիճակը։
Ոստիկանության՝ ՆԳՆ մամուլի խոսնակ Նարեկ Սարգսյանն է ասել, որ Ճամբարակ–Թթուջուր հատվածում բռնկված կրակի մասին իրենք տեղեկացել են միայն ահազանգից հետո։Դիլիջանի և հարակից անտառներում հրդեհի պատճառած վնասների չափը դեռևս չի հաշվարկվել։ Էկոպարեկային ծառայության պետի օգնական Լուսինե Հակոբյանը նշում է, որ անհրաժեշտ է մանրամասն գույքագրում՝ գնահատելու համար թե՛ բնությանը հասցված վնասը, թե՛ տարածքի վերականգնման ծավալները։Նրա խոսքով՝ այս փուլում դեռ հնարավոր չէ ասել, թե որն է եղել հրդեհի ճշգրիտ պատճառը։
