«Փաստ» օրաթերթը գրում է.
Օրերս ՌԴ ԱԳՆ մամուլի խոսնակ Մարիա Զախարովան, պատասխանելով լրագրող, քաղաքական մեկնաբան Հայկ Խալաթյանի հարցին, ասել էր, որ իրենք ուշադիր հետևում են «Հայաստանի էլեկտրական ցանցեր» ՓԲԸ-ի և Սամվել Կարապետյանի շուրջ ստեղծված իրավիճակին: «Արտասահմանում ռուսական բիզնեսի շահերի պաշտպանությունը, ինչպես գիտեք, առաջնահերթություն է, բացարձակ առաջնահերթություն»,-ասել էր Զախարովան ու մանրամասներ ներկայացրել ներդրումային որոշ մանրամասներ:
Ի մասնավորի, ՌԴ ԱԳՆ մամուլի խոսնակը հիշեցրել էր, որ 2017-2023 թվականներին, ներառյալ ենթակառուցվածքների արդիականացումը, ընկերությունը ծախսել է 680 միլիոն դոլար, իսկ 2024-2034 թվականների համար նախատեսված էին 795 միլիոն դոլարի ներդրումներ։ «Փաստ» թերթի տեղեկություններով, այս անդրադարձը բավականին անհանգստություն է պատճառել իշխանություններին:
Նախ, ինչպես փոխանցում են մեր աղբյուրները, նրանք վստահություն ունեն, որ նշյալ հարցը նախապատրաստված է եղել, քանի որ Զախարովայի պատախանները չափազանց պատրաստված էին: Իշխանությունները կարծում են, որ նա չէր կարող ուղղակի «ոտքի վրա» տիրապետել ներդրումային այդպիսի տեղեկությունների, այսինքն՝ նախապես պատրաստի տեղեկանք է ունեցել ձեռքի տակ:
Մյուս կողմից՝ Զախարովան ընդգծված հարգալից է խոսել Սամվել Կարապետյանի մասին: Այս ամենը, մեր տեղեկություններով, իշխանություններն ընկալում են որպես լրացուցիչ «մեսիջ», որ Ռուսաստանը ոչ միայն անտարբեր չէ կատարվողի նկատմամբ, ոչ միայն «ուշադիր հետևում է» իրադարձություններին, այլև, հնարավոր է, նոր փուլ է սկսվում, որն այս պահին գոնե արտաքուստ նկատելի չէ:
Մանրամասները՝ «Փաստ» օրաթերթի այսօրվա համարում
