Բագրատ Սրբազանը աջակիցների հետ ակցիա է իրականացնում Նախագահի նստավայրի մոտ։ Ակցիայի նպատակը, նախագահի կողմից այսօր ստորագրված սահմանազատման հանձնաժողովների կանոնակարգը վավերացնելու մասին օրենքն է:
Բագրատ Սրբազանը լրագրողների հետ զրույցում նշել է, որ գործընթացը ծայրից ծայր ստախոսություն է:
Ինչ վերաբերում է շարժման գործողությունների ուշացած լինելուն, Սրբազանն ասաց, որ իրենց գործողություններն ուշացած չեն, ճիշտ ժամանակին են.
«Մենք անում ենք այն, ինչ ծրագրել ենք: Անկախ նրանից այս շենքերում մարդիկ կա՞ն թե ոչ, այդ մարդիկ բացակա են: Փաստացի, եթե նույնիսկ ստորագրած էլ չլինեին, մենք այստեղ գտնվեինք նույն հորդորով ու պահանջով, նույն արձագանքն էր լինելու, ինչը որ հիմա կա: Մեր երկրում ոչ մի ինստիտուտ չի գործում՝ ո՛չ օրենքով, ո՛չ սահմանված կարգով, ո՛չ էլ բարոյական իմաստով»:
Բագրատ սրբազանը նաեւ հակադարձեց, նշելով, թե շարժման շարքերը չեն նոսրացել.
«Մեր աջակիցներն ամենուր են, որ ժամին պետք եղավ՝ իրենք կհավաքվեն, մեր շարքերը չեն նոսրացել»,- ասաց նա:
Հիշեցնենք, որ նախագահ Վահագն Խաչատուրյանը հոկտեմբերի 24-ին ստորագրել է «Հայաստանի Հանրապետության և Ադրբեջանի Հանրապետության միջև պետական սահմանի սահմանազատման և սահմանային անվտանգության հարցերով հանձնաժողովի ու Ադրբեջանի Հանրապետության և Հայաստանի Հանրապետության միջև պետական սահմանի սահմանազատման պետական հանձնաժողովի համատեղ գործունեության մասին» կանոնակարգը վավերացնելու մասին» օրենքը:
