Հրապարակ օրաթերթը» գրում է․
Ինչպեսեւ սպասելի էր, երեկ ՔՊ-ականները, բանուգործը թողած, սինքրոն արձագանքում էին ՀՀ երկրորդ նախագահ Ռոբերտ Քոչարյանի ասուլիսի ժամանակ հնչած մտքերին եւ այնքան քննարկելու-քննադատելու բան չունեին, որ պետության երկրորդ պաշտոնյայից սկսած՝ քննարկում էին Քոչարյանի` ասուլիս հրավիրելու օրվա ընտրությունը։
Հոկտեմբերի 7-ին, ինչպես հայտնի է, ՌԴ նախագահ Վլադիմիր Պուտինի ծննդյան օրն է:ԱԺ նախագահ Ալեն Սիմոնյանի կարծիքով, Քոչարյանը հատուկ է այդ օրը ընտրել․ «Իսկական վոինը, իսկական դաշնակիցը, որ հավասարը հավասարի պես է խոսում, պետք է նույնիսկ ասուլիսը հարմարեցնի նաչալնիկի ծննդյան օրվա հետ»։
Ասուլիսից հետո երկրորդ նախագահին խնդրեցինք պարզաբանել օրվա ընտրությունը՝ նշելով իշխանականների շահարկումը։ Նա ժպտաց` ասելով, որ ասուլիսի դահլիճն ազատ չի եղել:
«Երկու շաբաթ առաջ ենք ընտրել, դահլիճը միայն այսօր էր ազատ` վաղը, մյուս օրը զբաղված է լինելու, այդ պատճառով միայն»։ Ի դեպ, ինչպես նախորդ, այնպես էլ այս ասուլիսի ընթացքում նախկին նախագահին ջուր, սուրճ մատուցում էր նրա դուստրը՝ Գայանեն։Ասուլիսին ոչ բոլոր լրատվամիջոցներն էին հրավիրված՝ մոտ երկու տասնյակ, ինչը չհրավիրված լրագրողները ծանր էին տարել:
Քոչարյանն այդ խտրականությունը պարզաբանեց այսպես. ծանր է 4-5 ժամ ասուլիս տալը, հետեւաբար հրավիրել են քիչ թվով լրագրողների, որ բոլորը կարողանան հարց տալ, ակնարկեց, որ հաջորդ անգամ այլ կազմ կհրավիրվի։
