Գիտնականների միջազգային խումբը պարզել է, որ այն զույգերը, որոնք հանդիպել են օֆլայն՝ դպրոցում, աշխատանքի վայրում կամ ընկերների միջոցով, միջինում իրենց հարաբերությունները գնահատում են որպես ավելի երջանիկ և ունեն ավելի ուժեղ սիրո զգացում, քան այն զույգերը, որոնք հանդիպել են առցանց: Աշխատանքը հրապարակվել է «Տելեմատիկա և ինֆորմատիկա» ամսագրում։
Աշխատանքի հեղինակները վերլուծել են 50 երկրներից ավելի քան 10,000 մեծահասակների տվյալներ: Ուշադրության կենտրոնում էին 6,600 մասնակիցներ, որոնք հարցման պահին հարաբերությունների մեջ էին: Գիտնականները համեմատել են իրական կյանքում հանդիպածների և իրենց զուգընկերոջը առցանց՝ ծանոթությունների կայքերում և հավելվածներում հանդիպածների միջև հարաբերությունների որակը։
Պարզվել է, որ «օնլայն» զույգերը հաճախ ունեցել են հարաբերություններից բավարարվածության ավելի ցածր մակարդակ և սիրո երեք բաղադրիչների՝ մտերմության, կիրքի և հատկապես զուգընկերոջ նկատմամբ նվիրվածության ավելի քիչ դրսևորում: Այս տարբերությունները պահպանվել են նույնիսկ տարիքը, հարաբերությունների տևողությունը և սոցիալ-տնտեսական կարգավիճակը հաշվի առնելուց հետո։
Հետաքրքիր է, որ տարբերությունները ավելի նկատելի էին տղամարդկանց և 33 տարեկանից բարձր մարդկանց մոտ: Կանանց և երիտասարդ մասնակիցների շրջանում առցանց և օֆլայն ծանոթությունների միջև հակադրությունն ավելի թույլ էր։
Վրոցլավի համալսարանի «Մարդ լինելը» լաբորատորիայից հետազոտության ղեկավար Մարթա Կովալի խոսքով՝ արդյունքները չեն նշանակում, որ «օնլայն» զույգերը դատապարտված են։
«Շատերը երկարատև և երջանիկ հարաբերություններ են գտնում առցանց։ Սակայն միջին հաշվով, նրանք, ովքեր հանդիպել են օֆլայն, ավելի հաճախ են հայտնում ավելի բարձր մակարդակի բավարարվածության և ուժեղ սիրո մասին», - նշել է գիտնականը։
Հեղինակները ենթադրում են, որ հարաբերությունների որակի վրա կարող են ազդել առցանց ժամադրությունների բնութագրերը՝ ընտրության ավելցուկ, զուգընկերների մշակութային և սոցիալական ծագման ավելի քիչ նմանություն, ինչպես նաև հանդիպման ժամանակ սպասումների և իրականության միջև անհամապատասխանություն։
Թարգմանությունը՝ Euromedia24.com-ի
