Ռուսաստանը կվերադառնա Վեներայի ուսումնասիրմանը՝ մոլորակի, որը համարվում է արտերկրյա կյանքի նշանների որոնման ամենահեռանկարային օբյեկտներից մեկը։ Առաջիկա տարիներին «Ռոսատոմ»-ի և «Ռոսկոսմոս»-ի կողմից համատեղ մշակված «Տիեզերական ատոմ» դաշնային նախագծի շրջանակում կստեղծվի ուղեծրային սարք և վայրէջքային մոդուլ՝ մոլորակի մթնոլորտը և մակերեսը ուսումնասիրելու համար։ Այս մասին հայտնել է «ԱտոմՄեդիա»-ի մամուլի ծառայությունը «Газета.Ru»-ին։
«Վեներան ամենահեռանկարայինն է արտերկրյա կյանքի նշանների որոնման տեսանկյունից։ Ի դեպ, մենք միակն ենք աշխարհում, ովքեր վայրէջք են կատարել այդ մոլորակի վրա։ Եվ այժմ մենք ստեղծում ենք ուղեծրային սարք և վայրէջքային մոդուլ՝ մթնոլորտն ու մակերեսը ուսումնասիրելու համար», — հայտարարել է «Ռոսկոսմոս»-ի գլխավոր տնօրեն Դմիտրի Բականովը՝ ատոմային ոլորտի 80-ամյակին նվիրված իր ուղերձում։
Վեներայի յուրահատուկ պայմանները՝ բարձր ջերմաստիճանը, երկրի համեմատությամբ տասնյակ անգամ մեծ ճնշումը և ագրեսիվ մթնոլորտը, դարձնում են հետազոտությունները հատկապես բարդ։ Այդ խոչընդոտները հաղթահարելու համար նախատեսվում է կիրառել նոր ատոմային տեխնոլոգիաներ, որոնք սարքերին թույլ կտան աշխատել այնտեղ, որտեղ արևային էներգիան անբավարար է։
«Ռոսատոմ»-ում նշում են, որ հենց ատոմային էներգետիկ կայանները կդառնան խորը տիեզերքում երկարաժամկետ առաքելությունների առանցքը։ Այս մշակումները կարելի է կիրառել նաև այլ մոլորակների, այդ թվում՝ Մարսի ուսումնասիրության համար։ Հիմքը կդառնա նաև Լուսնի ատոմային կայանի կառուցման փորձը, որի գործարկումը նախատեսվում է 2030 թվականին և որը կկարողանա էներգիայով ապահովել սարքավորումները երկու շաբաթ տևողությամբ լուսնային գիշերվա ընթացքում։
Վերադարձը Վեներայի ուսումնասիրմանը կարող է մեծ առաջընթաց լինել աստրոբիոլոգիայի ոլորտում։ 2020 թվականին մոլորակի մթնոլորտում ֆոսֆին գազի հայտնաբերումը և քննարկվող երկրաքիմիական անոմալիաները գիտնականներին ստիպում են կրկին Վեներան դիտարկել որպես արտերկրյա կյանքի որոնման հիմնական թեկնածուներից մեկը։
Թարգմանությունը՝ Euromedia24.com-ի
