Գերմանացի նյարդաբանները պարզել են, որ դեպրեսիայի զարգացման եզրին գտնվող մարդիկ նշաձև ուղեղում ավելի մեծ ծավալի մոխրագույն նյութ ունեն, քան առողջ մասնակիցները և նրանք, ովքեր արդեն տառապում են դեպրեսիայով: Աշխատանքը հրապարակվել է Neuropsychopharmacology (NPP) ամսագրում:
Նշաձև ուղեղը ուղեղի այն մասն է, որը կապված է հույզերի, անհանգստության և հիշողության հետ: Այն ավանդաբար կապված է դեպրեսիայի հետ, սակայն նախորդ ուսումնասիրությունները գրանցել են մոխրագույն նյութի ծավալի նվազում հիվանդների մոտ, հատկապես հիվանդության երկարատև ընթացքի կամ բազմակի դրվագների դեպքում:
Այժմ Մյունստերի համալսարանի գիտնականները պարզել են, որ նրանք, ովքեր գտնվում են միայն նախադեպրեսիվ վիճակում, ընդհակառակը, նշաձև ուղեղում ավելի մեծ ծավալի մոխրագույն նյութ ունեն, քան մյուս բոլոր խմբերը, այդ թվում՝ արդեն հիվանդները: Սա կարող է վկայել ուղեղի ժամանակավոր խոցելիության մասին դեպրեսիայի առաջին դրվագի նկատմամբ:
Ուսումնասիրությանը մասնակցել է ավելի քան 1700 մարդ: Նրանց թվում էին առողջ կամավորներ, տրամադրության խանգարումներով, անհանգստությունով և փսիխոզով հիվանդներ, և հատուկ խումբ՝ մարդիկ, որոնց մոտ դեպրեսիա է զարգացել սկանավորումից կարճ ժամանակ անց:
Բացի նշաձև ուղեղի աճից, ապագա հիվանդների մոտ նաև մոխրագույն նյութի ծավալի նվազում է նկատվել հույզերի և ինքնատիրապետման հետ կապված այլ հատվածներում: Այս փոփոխությունները նման էին արդեն հիվանդ մարդկանց մոտ առկա պատկերին։
«Մեր ուսումնասիրությունն առաջին անգամ հնարավորություն տվեց բացահայտել դեպրեսիայի մոտալուտ ի հայտ գալու նյարդային մարկերները: Սա կարող է օգնել հիվանդության վաղ ախտորոշմանը և կանխարգելմանը», - նշել են հեղինակները:
Թարգմանությունը՝ Euromedia24.com-ի
