Գերմանիայի հարավ-արևմուտքում գտնվող Բադեն-Վյուրտեմբերգ երկրամասում ուղևորատար գնացքի ռելսերից դուրս գալու հետևանքով վիրավորվել է առնվազն 41 մարդ, հայտնում է Ուլմի ոստիկանական բաժանմունքը։
Ավելի վաղ Spiegel-ը հայտնել էր, որ կիրակի երեկոյան ուղևորատար գնացքի ռելսերից դուրս գալու հետևանքով երեք մարդ է զոհվել։
«Վթարի հետևանքով, ընդհանուր առմամբ, մահացել է երեք մարդ, այդ թվում՝ վարորդը և երկաթուղու մեկ այլ աշխատակից։ Երրորդ զոհվածը գնացքի ուղևոր էր։
Բացի այդ, առնվազն 41 մարդ վիրավորվել է, որոնցից մի քանիսը ծանր վիճակում են», - ասվում է ոստիկանության մամուլի հաղորդագրության մեջ: Վիրավորները տեղափոխվել են մոտակա հիվանդանոցներ:
Իր հերթին, Bild տաբլոիդը հաղորդում է, որ վթարի հետևանքով վիրավորվել է մոտ 50 մարդ, որոնցից 25-ը՝ ծանր վիճակում։
