Զտված շաքարով գազավորված ըմպելիքների կանոնավոր օգտագործումը կարող է փոփոխություններ առաջացնել աղիքային մանրէների ԴՆԹ-ում և խաթարել իմունային համակարգը։ Այս եզրակացությանն են հանգել Իսրայելի տեխնոլոգիական ինստիտուտի գիտնականները։ Ուսումնասիրության արդյունքները հրապարակվել են Nature Communications (NatCom) ամսագրում։
Ուշադրության կենտրոնում էր միկրոբիոմի հիմնական ներկայացուցիչներից մեկը՝ Bacteroides thetaiotaomicron բակտերիան։ Այն կարևոր դեր է խաղում աղիքները բորբոքումից և հարուցիչներից պաշտպանելու գործում։ Պարզվել է, որ գազավորված ըմպելիքի մեջ պարունակվող շաքարի ազդեցության տակ այս մանրէն ենթարկվում է այսպես կոչված ինվերսիաների՝ ԴՆԹ բեկորների վերադասավորումների, որոնք փոխում են դրա ակտիվությունը։
Մկների վրա կատարված լրացուցիչ փորձարկումները ցույց են տվել, որ այս փոփոխությունները միաժամանակ ազդում են մի քանի կարևոր գործընթացների վրա։ Դրանք ներառում են բորբոքային մարկերների մակարդակի կարգավորումը, T-բջիջների ակտիվությունը, ցիտոկինների (իմունային համակարգի ազդանշանային սպիտակուցային մոլեկուլներ) արտադրությունը և նույնիսկ աղիքային պատերի թափանցելիությունը։
Բջջային գծերի, կրծողների և կամավորների վրա կատարված ուսումնասիրությունները նույնպես հաստատել են, որ միկրոբիոտան արագ արձագանքում է սննդակարգում առկա շաքարին։ Սակայն, ինչպես ընդգծում են հեղինակները, այս ազդեցությունները շրջելի են. շաքարային գազավորված ըմպելիքներից հրաժարվելուց հետո մանրէների ԴՆԹ-ն վերադառնում է իր սկզբնական վիճակին, իսկ իմունային համակարգի ցուցանիշները՝ նորմալ։
Գիտնականները ընդգծում են. սնունդը անմիջական ազդեցություն ունի միկրոբիոմի և իմունիտետի փոխազդեցության վրա։ Նրանց կարծիքով, նոր տվյալները կարող են հիմք հանդիսանալ անհատականացված սննդակարգային առաջարկությունների համար, որոնք ուղղված են բորբոքային հիվանդությունների ռիսկի նվազեցմանը և ընդհանուր առողջության պահպանմանը։
Թարգմանությունը՝ Euromedia24.com-ի
