Գազայի հատվածի վրա Իսրայելի կողմից հուլիսի 17-ին իրականացված հարձակումների հետևանքով զոհվել է առնվազն 56 մարդ, հաղորդում է Կատարի «Ալ Ջազիրա» հեռուստաալիքը՝ հղում անելով Գազայի առողջապահության նախարարությանը։
Գործակալության տվյալներով՝ անկլավի հյուսիսային մասում սպանվել է ավելի քան 40 պաղեստինցի խաղաղ բնակիչ, այդ թվում՝ 14 մարդ, որոնք սպասում էին մարդասիրական օգնության բաշխման կետերում սնունդ ստանալու: Հաղորդվում է նաև ինը խաղաղ բնակիչների մահվան մասին հատվածի հարավային մասում՝ օկուպացիոն ուժերի կողմից դպրոցի այն տարածքի հրետակոծության հետևանքով, որտեղ տեղակայված էին տեղահանված անձանց համար նախատեսված վրաններ:
Գազայի առողջապահության նախարարության տվյալներով՝ Իսրայելի կողմից պաղեստինյան անկլավի դեմ մղվող պատերազմի ընթացքում զոհվել է 58,667 մարդ, իսկ վիրավորվել՝ 139,974-ը։
