Հնդկաստանը հաջողությամբ փորձարկել է երկու կարճ հեռահարության բալիստիկ հրթիռ՝ «Պրիթհվի-II»-ը և «Ագնի-I»-ը, հայտնում է երկրի պաշտպանության նախարարությունը։
Փորձարկումները տեղի են ունեցել Չանդիպուրի (արևելյան Օդիշա նահանգ) փորձարկման հրապարակում։ Հրթիռները արձակվել են Ռազմավարական ուժերի հրամանատարության վերահսկողության ներքո։ «Բոլոր տեխնիկական և գործառնական պարամետրերը հաստատվել են», - ընդգծել է Հնդկաստանի ռազմական գերատեսչությունը։
«Պրիթհվի-II»-ը և «Ագնի-I»-ը Հնդկաստանի ռազմավարական զինանոցի մաս են կազմում և նախատեսված են բարձր ճշգրտությամբ հարվածներ հասցնելու համար: «Պրիթհվի-II»-ը կարող է կրել 0.5-ից 1 տոննա քաշով մարտագլխիկ և ունի 250-ից 350 կմ հեռահարություն:
Այն հագեցած է հրթիռներից խուսափելու տեխնոլոգիաներով և օգտագործում է նշանառման ամենաժամանակակից համակարգ։ Դրա շարժիչը նախագծվել է խորհրդային B-755 զենիթային հրթիռի (S-75 համալիր) շարժիչի հիման վրա։
«Ագնի» շարքի բալիստիկ հրթիռները Հնդկաստանի պաշտպանության նախարարության կառավարվող հրթիռների մշակման համապարփակ ծրագրի մաս են կազմում: Երկրում սպառազինության մեջ կան այս հրթիռների չորս տեսակ: «Ագնի-I»-ն ունի 700 կմ հեռահարություն:
