«Փաստ» օրաթերթը գրում է.
Վերջին շրջանում ավելի ու ավելի հաճախակի ենք դժգոհություններ ու ահազանգեր ստանում մի շարք կահույք արտադրողներից ու ներմուծողներից, որ դաշտում առկա է անհավասար մրցակցություն:
Բանն այն է, որ, մեզ դիմած գործարարների խոսքերով, այսպես թե այնպես, որոշակի արտոնյալ վիճակում են գտնվում Արգավանդում գտնվող խանութներն ու արտադրամասերը:Ինչպես նշեց մեր զրուցակիցներից մեկը, մեծամասամբ շարունակում են ապրանքի գները սահմանել դոլարով, իսկ վճարումն ընդունել կա՛մ դոլարով, կա՛մ «օրվա կուրսով»՝ առավելապես կանխիկ, հաճախ առանց ՀԴՄ կտրոնի:
Երբեմն էլ, եթե փոխանցումով է կատարվում, ապա փոխանցվում է որևէ ֆիզիկական անձի հաշվեհամարի: Գործարարի փոխանցմամբ, խոսքը գուցե ոչ բոլորի, բայց մեծամասնության մասին է, ինչը ստվերային շրջանառության կասկածներ ու ռիսկեր է պարունակում:
Նրանց գումարվում են նաև նույնկերպ աշխատող որոշ արտադրամասեր, որոնք խանութ էլ չունեն և աշխատում են հիմնականում «առցանց»՝ հենց արտադրամասից առաքումով:Մեկ այլ գործարար «Փաստի» հետ զրույցում նշում էր, որ հարկատուներին հերոս համարող կառավարությունը փորձել է քայլեր ձեռնարկել այս ուղղությամբ, բայց որևէ արդյունքի չի հասել, կամ գուցե հետևողական չի եղել՝ գուցե այն պատճառով, որ վախենում են «բունտի նոր օջախ» ստանալուց, քանի որ առանց այդ էլ նման «օջախների» պակաս չկա, իսկ ընտրության շեմին կառավարությունը վախենում է դժգոհության նոր ալիքից:
Սակայն, մեր զրուցակցի խոսքով, սրա արդյունքում տուժում են բարեխիղճ հարկատուները, քանզի նման պայմաններում, երբ իրենք գործում են լիարժեք օրինական դաշտում, չեն դիմանում մրցակցությանը:
Ավելին, կան տեղեկություններ, որ մի քանիսն արդեն նույնիսկ սնանկացման շեմին են:
