ԱՄՆ նախագահ Դոնալդ Թրամփի վարչակազմը Գերագույն դատարան է դիմել՝ փորձելով վերացնել միգրանտներին ժամանակավոր օրինական կարգավիճակ տրամադրող ծրագրերը, որոնք գործարկվել էին Ջո Բայդենի օրոք։ Խոսքը վերաբերում է մոտ 530,000 վենեսուելացի, կուբացի, հաիթցի և նիկարագուացի միգրանտների, ովքեր այժմ ապրում են ԱՄՆ-ում։ «Parole» անվանումով այս ծրագիրը միգրանտներին թույլ էր տալիս ժամանակավոր բնակվել և աշխատել ԱՄՆ-ում՝ հումանիտար հիմքերով։ Թրամփը 2025-ի հունվարին ստորագրել էր հրամանագիր՝ դրա դադարեցման մասին, իսկ Մարտին արդեն սկսվել էր գործընթացը՝ կրճատելու միգրանտներին տրված երկու տարվա «parole»-ները։
Բոստոնի դաշնային դատարանը արգելափակել էր ծրագրի համատարած վերացումը՝ պնդելով, որ յուրաքանչյուր դեպքը պետք է գնահատվի անհատապես։ Սակայն Թրամփի վարչակազմը պնդում է, որ սա «խոչընդոտում է օրինական ճանապարհով հաստատված ներգաղթի քաղաքականությունը»։Դիմումի մեջ վարչակազմը նշել է, որ դատարանն «անցել է գործադիր իշխանության սահմանները՝ խախտելով արտգործնախարարության և ներգաղթի իրավասությունները»։ «Վարչակազմը փորձում է պատժել մարդկանց, ովքեր կատարում են օրենքով սահմանված բոլոր պահանջները», — նշել է «Justice Action Center» իրավապաշտպան կազմակերպության տնօրեն Կարեն Թամլին։
Թրամփը փաստարկում է, որ կարգավիճակի չեղարկումը հեշտացնելու է այս միգրանտների՝ արագ արտաքսման ընթացքը, սակայն իրավապաշտպանները պնդում են՝ դա հարյուր հազարավոր մարդկանց միանգամից կդարձնի անօրինական և անաշխատունակ։ Գերագույն դատարանը կողմերին ժամանակ է տվել պատասխան ներկայացնելու մինչև մայիսի 15-ը, փոխանցում է Reuters-ը։
