Կոռնելի համալսարանի գիտնականները նոր պատվաստանյութ են մշակել, որը կարող է երկարաժամկետ պաշտպանություն ապահովել COVID-19-ից և գրիպից։ Հետազոտության արդյունքները հրապարակվել են Science Advances (SciAdv) ամսագրում:
Նոր դեղամիջոցը լուծում է գոյություն ունեցող պատվաստանյութերի երկու հիմնական խնդիր՝ չափազանց ցածր ջերմաստիճանում պահելու անհրաժեշտությունը և արդյունավետության բացակայությունը: Նորարարական պատվաստանյութը ոչ միայն ապահովում է պաշտպանություն COVID-19-ից և գրիպից, այլև չի պահանջում պահպանման բարդ պայմաններ, ինչը մեծապես հեշտացնում է դրա տեղափոխումն ու օգտագործումը, հատկապես սահմանափակ ռեսուրսներ ունեցող երկրներում։
Դեղամիջոցի հիմքում ընկած է վեզիկուլյար ստոմատիտի վիրուսը (VSV), որն անվտանգ է մարդկանց համար։ Գիտնականները փոփոխել են այն՝ հեռացնելով հիմնական սպիտակուցները և ավելացնելով հակագեններ երկու վիրուսներից: Այս մոտեցումը թույլ է տալիս իմունային համակարգին զարգացնել պաշտպանություն միանգամից երկու հիվանդություններից։
Առանձնահատուկ ուշադրություն է դարձվում իմունային պաշտպանության տեւողությանը։ Մկների վրա կատարած փորձերի ժամանակ պատվաստանյութը ցույց տվեց բարձր արդյունավետություն. պատվաստումից ութ ամիս անց կենդանիները պահպանեցին ուժեղ իմունիտետ: Ավելին, երբ պատվաստված մկները վարակվում էին COVID-19-ով և գրիպի վիրուսներով, նրանք հիվանդության ախտանշաններ չէին ցույց տալիս, իսկ թեստերը ցույց տվեցին, որ նրանց թոքերի կամ ուղեղի հյուսվածքում վիրուսներ չկան, ինչը ցույց է տալիս պաշտպանվածության բարձր աստիճան:
Գիտնականները ենթադրում են, որ իմունային պաշտպանությունը պահպանելու համար կարող են անհրաժեշտ լինել մի քանի տարին մեկ խթանող ներարկումներ, ինչը զգալիորեն կնվազեցնի առողջապահական համակարգերի բեռը:
Թարգմանությունը՝ Euromedia24.com-ի
