NEWS.am-ը գրում է.
Բաքվի ռազմական դատարանում երեկ շարունակվեց Ռուբեն Վարդանյանի գործով «դատավարությունը»:
Ադրբեջանական լրատվամիջոցներից տեղեկացանք, որ նա հրաժարվել է պաշտպանից: Թեմայի շուրջ NEWS.am-ը մեկնաբանություն խնդրեց ՄԻԵԴ-ում հայ գերիների շահերի պաշտպան, փաստաբան Սիրանուշ Սահակյանից:
Տիկին Սահակյան, երեկ շարունակվեց Ռուբեն Վարդանյանի գործով «դատավարությունը» և ադրբեջանական լրատվամիջոցներից տեղեկացանք, որ նա հրաժարվել է պաշտպանից, դատարանն էլ կարծես բավարարել է դա: Որևէ նոր տեղեկություն ունե՞ք այդ մասին:
Նախ հստակեցնեմ, որ Ռուբեն Վարդանյանը հրաժարվել է պետության կողմից նշանակված՝ պետական պաշտպանի ծառայություններից, որին դատախազը ներկայացրել էր առաջին նիստում` պատճառաբանելով թե իբր ելնելով գործի բարդությունից, Վարդանյանին անհրաժեշտ է ևս մեկ պաշտպան։ Վարդանյանը հայտարարել էր, որ այդ փաստաբանն իրեն ոչ մի իրավական օգնություն չի ցուցաբերել, երբևէ չի այցելել մեկուսարան և ինքը նրան չի վստահում:
Այդ ժամանակ մեղադրող կողմն առարկել էր՝ պնդելով, որ պետության կողմից նշանակված փաստաբանը պետք է մնա։ Սակայն, իմ տեղեկություններով, երեկվա նիստում պետական պաշտպանից հրաժարվելու՝ Վարդանյանի միջնորդությունը բավարարվել է: Վարդանյանի շահերն այնտեղ պաշտպանելու է Ադրբեջանում լիցենզավորված նրա մասնավոր փաստաբանը՝ Աբրահամ Բերմանը:
Իսկ միջազգային փաստաբանի՝ Ջարեդ Գենսերի հետ տեսակցելու և նրա իրավաբանական օգնությունն ստանալու հնարավորությունից նա զրկված է, քանի որ Ադրբեջանի դատախազությունը մերժել էր Գենսերի՝ Բաքու այցելելու դիմումը:
Երեկվա նիստում ընթերցվել է «մեղադրական եզրակացության»՝ հենց Ռուբեն Վարդանյանին վերաբերող մասը: Ընդ որում՝ մեղադրանքները մեկը մյուսից անհավանական են ու զավեշտալի:
Այո, իսկապես, ներկայացված մեղադրանքները դուրս են ողջամտության սահմաններից, ուստի անհնար է դրանք մեկնաբանել կամ հակափաստարկներ բերել դրանց:
