Մասաչուսեթսի տեխնոլոգիական ինստիտուտի (MIT) Համակարգչային գիտության և արհեստական բանականության լաբորատորիայի (CSAIL) հետազոտողները ներկայացրել են հետաքրքիր մշակում, որը կոչվում է RoboGrocery: Սա ռոբոտային համակարգ է, որն ունի համակարգչային տեսողություն և փափուկ ձեռք, որպեսզի ճշգրիտ փաթեթավորի իրերի լայն տեսականի, ներառյալ ճնշման նկատմամբ զգայուն մրգերն ու սնունդը, տեղեկացնում է Techcrunch.com-ը:RoboGrocery-ի հնարավորությունները ցուցադրելու համար հետազոտողները ռոբոտի համար անհայտ 10 իր են տեղադրել մթերքների ժապավենի վրա: Բացի կոշտ իրերից, ինչպիսիք են պաղպաղակի տարաները և սննդի տուփերը, եղել են նաև ճնշման նկատմամբ զգայուն ավելի շատ մթերքներ, ինչպիսիք են խաղողը, կեքսը և կրեկերները:Նախ՝ գործարկվում է համակարգչային տեսողության համակարգը, որն օգտագործվում է առարկաները ճանաչելու համար, նախքան ժապավենի վրա դրանց չափը և գտնվելու վայրը որոշելը: Երբ ռոբոտային ձեռքը դիպչում է խաղողին, ինտեգրված ճնշման սենսորները հայտնաբերում են, որ տվյալ իրը փափուկ է, ինչը նշանակում է, որ այն չպետք է դրվի տարայի ներքևում: Այնուհետև ռոբոտը որոշում է, որ ապուրի տուփն ավելի կոշտ կառուցվածք ունի, ինչից հետո հենց դա է առաջինը տեղադրում տարայում։
«Սա առաջին կարևոր քայլն է այն ուղղությամբ, որ իրական կյանքում մթերքները և այլ իրերը փաթեթավորեն ռոբոտները: Թեև մենք այնքան էլ պատրաստ չենք կոմերցիոն նպատակով այն կիրառելուն, մեր հետազոտությունը ցույց է տվել, որ հնարավոր է զգայական մի քանի մեթոդներ ինտեգրել փափուկ ռոբոտային համակարգերում»,- ասել է Աննան Ժանգը՝ RoboGrocery-ի մշակողներից մեկը:Մշակողները նշել են, որ RoboGrocery-ում բարելավման ենթակա շատ բաներ կան, ներառյալ իրերը բռնելու և տեսողական համակարգի արդիականացումը, որպեսզի բարելավվի ապրանքների փաթեթավորման հերթականությունը որոշելու գործընթացը: Ավելի հուսալի դառնալուն զուգահեռ այս համակարգը կարող է օգտագործվել մթերային խանութներից դուրս, օրինակ՝ արդյունաբերության մեջ և թափոնների մաքրման կայաններում:
