Միտում չեմ տեսնում, որ Երևանը պատրաստվում է միջազգային դատական ատյաններում հետ կանչել Բաքվի դեմ հայցերը. բոլոր ընթացակարգերը շարունակվում են։
Այս մասին լրագրողների հետ զրույցում ասաց Միջազգային իրավական հարցերով Հայաստանի ներկայացուցիչ Եղիշե Կիրակոսյանը:
Նա չմեկնաբանեց վարչապետ Նիկոլ Փաշինյանի հայտարարություններն այն մասին, որ խաղաղության պայմանագրի ստորագրման դեպքում կողմերը կարող են փոխադարձաբար հրաժարվել հայցերից․
«Չեմ ուզում արտահայտել իմ դիրքորոշումը, կստացվի՝ մեկնաբանում եմ, ճիշտ կլինի այս պահի դրությամբ զերծ մնալ»,- ասաց Միջազգային իրավական հարցերով Հայաստանի ներկայացուցիչը։
Կիրակոսյանը չմեկնաբանեց նաև տեղեկությունները, որ ինքը դեմ է հայցերի հետքաշմանը։ Նշենք, որ Ադրբեջանը պարտադրում է Հայաստանին հրաժարվել միջազգային դատական ատյաններում ներկայացրած հայցերից։
Մինչդեռ Ադրբեջանն ինքն է COP29-ից հետո հերթական հայցը ներկայացրել Հայաստանի դեմ։
