Եվրոպական ներդրումային բանկի համաշխարհային ստորաբաժանումը (ԵՆԲ Գլոբալ) Հայաստանի հետ ստորագրել է շուրջ 236 միլիոն եվրոյի վարկային համաձայնագիր՝ «Հյուսիս-Հարավ» ճանապարհային միջանցքի կարեւորագույն՝ Սիսիան-Քաջարան ճանապարհահատվածի շինարարությունը համաֆինանսավորելու համար։
Այս նախագիծը կոչված է փոխելու իրերի դրությունը Հայաստանի եւ Հարավային Կովկասի տարածաշրջանի համար՝ զգալիորեն բարելավելով տրանսպորտային կապը Եվրոպական միության, Մերձավոր Արեւելքի եւ Ասիայի միջեւ:
Այս մասին ասված է Բանկի տարածած հաղորդագրության մեջ։
ԵՄ-ն Հայաստանին կտրամադրի 10 մլն եվրո դրամաշնորհ, որը կլրացնի ԵՆԲ-ի 25 մլն եվրոյի վարկը՝ ուղղված էներգաարդյունավետության բարելավմանը և Երևանի 6 կլինիկաների և 32 մանկապարտեզների վերակառուցմանը։
Ինչպես նաև ԵՆԲ Գլոբալ-ը 58,5 միլիոն եվրոյի վարկ է տրամադրում հայկական երեք բանկերի՝ երկրում միկրո, փոքր և միջին ձեռնարկությունների (ՓՄՁ) վարկավորումն ընդլայնելու նպատակով։ Եվրահանձնաժողովը ավելացնում է 11 մլն եվրո դրամաշնորհ բանկերին՝ բավարարելու հայաստանյան ՓՄՁ-ների համար տեղական արժույթով երկարաժամկետ ֆինանսավորման աճող պահանջարկը:
