Թուրքիայի Անթալիայում ձերբակալված ռուսաստանցին պարզվել է, որ «Կրեդո-Մեդ» կլինիկայի համասեփականատեր Մարատ Դրեյզինն է որը նախկինում դատապարտվել էր պետերբուրգյան «սանիտարների բանդայի» գործով, հայտնում է «Коммерсантъ»-ը։
Դրեյզինը ձերբակալվել է սեպտեմբերի 4-ին Ալանիայում՝ Ինտերպոլի կարմիր ծանուցման հիման վրա. Ռուսաստանի իրավապահ մարմինները նրան հետախուզում էին առանձնապես խոշոր խարդախության գործով։
Դրեյզինը անցնում էր այն խմբավորման գործով, որը վերահսկում էր Սանկտ Պետերբուրգի դիահերձարանների ստվերային եկամուտները և վերացվել էր 2005 թվականին։ Քննությունը խմբավորման հաշվին հաստատել էր շուրջ մեկ տասնյակ սպանություն։ Մասնավորապես, խմբավորման անդամներին կապել էին 2004 թվականին քաղաքային նարկոլոգիական հիվանդանոցի բուժմասի ղեկավար Լարիսա Արտյուխովսկայայի սպանության հետ։ Դրեյզինը ձերբակալվել էր սպանությանը մասնակցության կասկածանքով։ Քննության վարկածով՝ նա միջնորդի դեր էր կատարել պատվիրատուի և կատարողների միջև։ Դատարանը նրան դատապարտել էր չորս տարվա գաղութային ազատազրկման։
2021 թվականին Դրեյզինը կրկին դարձավ քրեական գործի ֆիգուրանտ։ Քննչական կոմիտեի տվյալներով, նա ապօրինի վաճառել էր մահացած մարդու բնակարանը, ապա փորձել էր կազմակերպել սադրանք գործով վկա կնոջ դեմ։ Քննությունը պնդում էր, որ Դրեյզինը մարդ էր փնտրում, որը կարող էր կնոջ մոտ թմրանյութեր գցել։ Ձերբակալությունից հետո նրան հաջողվել էր թաքնվել, և հետագայում նա կալանավորվել էր հեռակա կարգով։
DHA-ի տվյալներով, թուրքական ոստիկանությունը պարզել էր, որ Դրեյզինը գտնվում է Ալանիայում, ինչից հետո հետախուզական ստորաբաժանման և մաքսանենգության ու կազմակերպված հանցավորության դեմ պայքարի բաժնի աշխատակիցները նրան տեղական ժամանակով մոտ 16:30-ին ձերբակալել են Կարգըջաք թաղամասի Թևֆիք Մյուֆթյուօղլու փողոցում։ Նրան տեղափոխել են ոստիկանության վարչություն՝ անհրաժեշտ ընթացակարգերն իրականացնելու համար։
Ավելի վաղ «Фонтанка»-ն Դրեյզինին անվանել էր պետերբուրգյան ծիսական ծառայությունների շուկայի ամենանշանավոր դերակատարներից մեկը։
