Միացյալ Նահանգները ակնկալում է, որ Վենեսուելաում նավթի արդյունահանումը այս տարի կաճի 30–40%-ով՝ ամերիկյան ընկերությունների աջակցությամբ։ Այս մասին Bloomberg TV-ին տված հարցազրույցում հայտարարել է ԱՄՆ էներգետիկայի նախարար Քրիս Ռայթը։
«Մենք այս տարի Վենեսուելայում կտեսնենք նավթի արդյունահանման բավականին զգալի՝ 30–40% աճ», — նշել է նախարարը։
Նա հավելել է, որ ԱՄՆ-ը կշարունակի համագործակցությունը Վենեսուելայի իշխանությունների հետ՝ նախկինում և վերջերս կնքված բոլոր համաձայնագրերը գնահատելու, ինչպես նաև այն առաջնահերթությունները սահմանելու նպատակով, որոնք կհամապատասխանեն «Վենեսուելայի և Արևմտյան կիսագնդի շահերին»։
Հունվարի 3-ին Վենեսուելայի արտաքին գործերի նախարար Իվան Խիլ Պինտոն հայտարարել էր, որ ԱՄՆ-ը հարվածներ է հասցրել Կարակասի քաղաքացիական և ռազմական օբյեկտներին՝ այդ գործողությունները որակելով որպես ռազմական ագրեսիա։ Երկրում հայտարարվել է արտակարգ դրություն։
Ավելի ուշ Վաշինգտոնը հաստատել է հարվածների իրականացումը և հայտարարել Վենեսուելայի նախագահ Նիկոլաս Մադուրոի և նրա կնոջ ձերբակալման ու երկրից դուրս բերման մասին։ Հունվարի 5-ին նրանք ներկայացել են Նյու Յորք նահանգի դաշնային դատարան։ Նրանց մեղադրում են թմրամիջոցների ապօրինի շրջանառության մեջ ներգրավված լինելու համար։ Մադուրոն և նրա կինը մեղադրանքները չեն ընդունել։
