Վրաստանը չի փոխել իր քաղաքականությունը և չի նախատեսում սահմանափակիչ միջոցներ կիրառել Ռուսաստանի նկատմամբ, ինչպես նաև իր զինված ուժերը ուղարկել Ուկրաինա։ Այդ մասին հայտարարել է երկրի խորհրդարանի խոսնակ Շալվա Պապուաշվիլին՝ մեկնաբանելով Ուկրաինայի դեսպանի նշանակումը Թբիլիսիում գրեթե չորս տարվա ընդմիջումից հետո։
«Ինչպես գիտեք, Ուկրաինայի նախագահը նշանակել է դեսպան Վրաստանում։ Մի կողմից մենք ողջունում ենք այդ փաստը, սակայն մյուս կողմից առաջանում է մեկ հարց՝ ի՞նչ է փոխվել։ Վրաստանը չի փոխել իր քաղաքականությունը։ Ինչպես չորս տարի առաջ ասում էինք, որ երկկողմանի պատժամիջոցներ ՌԴ-ի դեմ չենք սահմանելու, այնպես էլ հիմա ենք ասում։ Ինչպես ասում էինք, որ մեր զինվորականներին չենք ուղարկելու այնտեղ կռվելու, այնպես էլ հիմա պետությունը չի պատրաստվում զինվորականներ ուղարկել Ուկրաինա», — լրագրողներին հայտարարել է Պապուաշվիլին՝ նշելով, որ հենց Ռուսաստանի նկատմամբ պատժամիջոցների և Ուկրաինա զինվորականներ ուղարկելու հարցերն էին 2022 թվականին պատճառ դարձել Ուկրաինայի դեսպանի հետկանչման Թբիլիսիից։
«Հուսով եմ, դեսպանի նշանակման այս փաստը խոսում է այն մասին, որ ուկրաինական իշխանությունները վերանայել են այն, ցավոք, թշնամական հռետորաբանությունը, որը մենք լսում էինք վրացիների հասցեին, ինչպես նաև հակավրացական որոշումները, այդ թվում՝ վրացական պետության դեմ, և հասկացել են, որ դա արդյունք չի տալիս։ Հետևաբար, դեսպանի նշանակումը կարևոր քայլ է», — ընդգծել է խորհրդարանի խոսնակը։
