«Դարեր շարունակ քրիստոնեական եկեղեցիները իրար մասունքներ են նվիրել, նվիրում են և նվիրելու են և դա բացառապես եկեղեցու իրավունքն է և որևէ մեկն այդտեղ ասելիք կամ անելիք չունի․ եկեղեցին է որոշում, եկեղեցին՝ նվիրում։ Բայց եկեղեցին գիտի, թե ինչ է նվիրում, ինչպես է նվիրում և այդ ամենի արդյունքում ինչպես է անխաթար մնում սրբությունը, որը առաջին դարից պահվել է հայոց աշխարհում։ Ամբողջ քրիստոնեական աշխարհը գիտի, որ Հայաստանում կա Սուրբ Գեղարդ, որը անխաթար է, անվնաս է և մշտապես Սուրբ Էջմիածնում է»,– այս մասին լրագրողների հետ զրույցում ասել է Մայր Աթոռ Սուրբ Էջմիածնի արխիվի և թանգարանների տնօրեն Ասողիկ աբեղա Կարապետյանը։
Նա պարզաբանել է, որ նվիրաբերվել է Գեղարդի մանրակերտը․ «Այդպիսի մանրակերտ կարող եք գնել ցանկացած հուշանվերային խանութում, եկեղեցու տարածքում»,– ասել է Տեր Ասողիկը՝ նշելով, որ մանրակերտի մեջ զետեղվել է կոթառի միջից դուրս բերված փշրանքը․ «Դա չի խաթարել Գեղարդի ամբողջականությունը և պատմական տեսքը, իսկ կոթառի միջից դուրս բերելը դա չի նշանակում Գեղարդը մասնատել, կտրել և այլն, ինչը որ շատ դատապարտելի կերպով շրջանառվում է»:
Հայր Ասողիկը մանրամասնել է, որ այդ մանրակերտը նվիրել է Ռուս ուղղափառ եկեղեցու պատրիարք Ալեքսիին՝ նրա ծննդյան 75–ամյակի առիթով և այսօր այն պահվում է Ռուս ուղղափառ եկեղեցու Սուրբ Կոստանդին, Սուրբ Հեղինե մենաստանում։
Նրա խոսքով՝ Գեղարդը համաքրիստոնեական սրբություն է, պարզապես Աստծո ողորմությամբ դարձել է Հայ եկեղեցում պահվող սրբություն։
«Մեր եկեղեցին, ինչպես 18-րդ դարում Նոյան տապանի բեկորը նվիրաբերել է ռուսաց կայսրուհուն, ինչպես Վազգեն վեհափառը Եթովայի կայսերն է նվիրաբերել Սուրբ Թադեոս առաքյալի մասունքը, ինչպես Գարեգին Առաջին վեհափառը Սուրբ Անդրեասի մասունքը նվիրաբերել է Ալեքսի պատրիարքին, այնպես էլ Գարեգին Երկրորդ կաթողիկոսը իր լիակատար իրավունքով իր եկեղեցու սուրբ մասունքներից ցանկացած անձի կարող է նվիրաբերել: Դա եկեղեցու հովվապետի բացառիկ և լիակատար իրավունքն է, որևէ մեկը այստեղ իրավունք չունի ձայն անգամ արձակելու»,– ասել է հոգևորականը:
Հայր Ասողիկը նաև հայտնել է, որ վկայի կարգավիճակով է հրավիրվել Քննչական կոմիտե։
