Չինաստանը հարգում է վրաց ժողովրդի ընտրությունը և պատրաստ է աշխատել բոլոր կողմերի հետ երկկողմ հարաբերությունները զարգացնելու համար։ Այս մասին ճեպազրույցում հայտարարել է Չինաստանի ԱԳՆ պաշտոնական ներկայացուցիչ Լին Ցզյանը՝ մեկնաբանելով Վրաստանում անցկացված խորհրդարանական ընտրությունները։
«Չինաստանը միշտ հարգել է վրաց ժողովրդի ընտրությունը և Վրաստանին անկեղծորեն ցանկանում է կայունություն և բարգավաճում: Չինաստանը պատրաստ է աշխատել բոլոր կողմերի հետ՝ նպաստելու չին-վրացական հարաբերությունների շարունակական զարգացմանը», - ասել է Չինաստանի ԱԳՆ պաշտոնական ներկայացուցիչը։
2023 թվականի հուլիսի վերջին Վրաստանը և Չինաստանը հայտարարեցին երկկողմ ռազմավարական գործընկերության հաստատման մասին։ Վրաստանի նախկին վարչապետ Իրակլի Ղարիբաշվիլին անցյալ տարվա սեպտեմբերին հայտարարեց Չինաստանի հետ վիզային ռեժիմը վերացնելու իր որոշման մասին։ Վրաստանի ներկայիս վարչապետ Իրակլի Կոբախիձեն այս տարվա փետրվարին հայտարարել էր Վրաստանի քաղաքացիների համար վիզաները չեղարկելու Չինաստանի իշխանությունների որոշման մասին։ Վրաստանի քաղաքացիների համար առանց վիզայի ռեժիմն ուժի մեջ է մտել մայիսի 28-ից։
