«Ես կոչ եմ անում աշխարհասփյուռ իմ քահանա եղբայրներին՝ ընդվզել բոլոր այն առաջնորդների դեմ, ովքեր մորթապաշտ և կարգազանց կեցվածքով համակարծիք են եկեղեցամարտ իշխանությունների հետ»,– Ռուսաստանի և Նոր Նախիջևանի հայոց թեմի հոգևորական՝ Տեր Սեբեոս քահանա Ղալաչյան Euromedia24-ի հետ զրույցում անդրադարձավ վերջին զարգացումներին, կալանավորված Միքայել, Բագրատ և Մկրտիչ սրբազանների դիրքորոշմանը, ինչպես նաև այն փաստին, որ թեմի հոգևորականներից մեկը՝ Տեր Հակոբ քհն. Սարոյանը, չի միացել թեմի հայտարարությանը։Քահանան համոզված է՝ երեք սրբազանների բանտարկությունն ինքնին «խոսուն ապացույց» է նրանց ընտրած ուղու մասին։
«Նրանց լինելը բանտում արդեն խոսում է իրենց կեցվածքի և ճշմարտացիության մասին։ Ինչ էլ որ իրենք ասեն այդ հալածանքների մեջ, մենք հա՝ անվերապահ պետք է աջակցենք»,– ընդգծում է Տեր Սեբեոս քահանա Ղալաչյանը:
Ըստ նրա՝ եթե առաջնորդը չի ենթարկվում իր վերադասին՝ Հայրապետին, ապա նրա նկատմամբ հնազանդությունը նույնպես կորցնում է իր բովանդակությունը։ Նրա ձևակերպմամբ՝ «հնազանդությունը չի կարող լինել միակողմանի և ընտրովի»։
Քահանան հիշեցրեց եկեղեցական հնազանդության սկզբունքը՝ ընդգծելով, որ այն չի կարող լինել ընտրովի․
«Եթե առաջնորդը չի ենթարկվում իր վերադասին՝ Հայրապետին, ապա մենք էլ պարտավորություն չունենք ենթարկվելու իրեն։
Դա պարզ կանոն է»։
Հարցին՝ ինչպե՞ս է մեկնաբանում այն, որ թեմի միակ հոգևորականը, ով չստորագրեց և չմիացավ հայտարարությանը, եղավ Տեր Հակոբ քհն. Սարոյանը, ում եղբայրը Գևորգ սրբազանն է, ով միացել է Նիկոլ Փաշինյանին, Տեր Սեբեոսը պատասխանեց․
«Ինչպե՞ս մեկնաբանեմ… Եթե մենք բոլոր այն եպիսկոպոսներին, ովքեր ժպտադեմ սեղմում են Փաշինյանի ձեռքը, անվանում ենք դավաճաններ, ապա նույն կերպ էլ կարող ենք անվանել Տեր Հակոբ Սարոյանին՝ դավաճան քահանա»։ Նա հավելեց, որ չի ցանկանում շատ ավելի խիստ որակումներ հնչեցնել։
Քահանան իշխանություններին անվանեց «թշնամական կառավարություն» և ընդգծեց․ «Թշնամական կառավարությունը օր առաջ պիտի հեռանա։ Հուսամ, որ հաջորդ հուլիսին այլևս չենք ունենա այս չարիքի իշխանությունը և նրա պարագլուխ Աղվեսին»,– եզրափակեց Տեր Սեբեոսը:
