Որոշակի մրգերի և բանջարեղենի օգտագործումը կարող է մեծացնել մարդու օրգանիզմում վնասակար թունաքիմիկատների քանակը: Այս եզրակացությանն են հանգել «Environmental Working Group» (EWG) ոչ կառավարական կազմակերպության հետազոտողները: Ուսումնասիրությունը հրապարակվել է «International Journal of Hygiene and Environmental Health» (IJHEH) ամսագրում:
Հետազոտողները վերլուծել են ԱՄՆ Գյուղդեպարտամենտի տվյալները 2013-2018 թվականներին մթերքներում թունաքիմիկատների մակարդակի վերաբերյալ, ինչպես նաև Հիվանդությունների վերահսկման և կանխարգելման կենտրոնների կողմից անցկացված Ազգային առողջության և սննդի հետազոտության հարցման (NHANES) մոտ 2000 մասնակիցների հարցման արդյունքները:
Պարզվել է, որ այն մարդկանց մոտ, ովքեր ավելի հաճախ էին օգտագործում թունաքիմիկատների բարձր մակարդակ ունեցող մրգեր և բանջարեղեն, ինչպիսիք են ելակը, սպանախը և բուլղարական պղպեղը, մեզի մեջ այդ նյութերի զգալիորեն ավելի բարձր կոնցենտրացիաներ ունեին, քան նրանց մոտ, ովքեր նախընտրում էին «մաքուր» մթերքներ: Նմուշներում հայտնաբերվել են 178 տարբեր թունաքիմիկատների հետքեր, բայց դրանցից միայն 42-ն են արտացոլվել մեզի բիոմարկերներում:
«Մեր արդյունքները ցույց են տալիս, որ մեր ուտածը անմիջականորեն ազդում է մեր օրգանիզմում թունաքիմիկատների մակարդակի վրա: Մրգերն ու բանջարեղենը կենսական նշանակություն ունեն առողջության համար, բայց դրանք նաև մեծացնում են մեր քիմիական բեռը», - բացատրեց ուսումնասիրության գլխավոր հեղինակ, EWG-ի գիտության փոխնախագահ, դոկտոր Ալեքսիս Թեմկինը։
Հեղինակները ընդգծում են, որ երեխաները և հղի կանայք հատկապես խոցելի են նման ազդեցության նկատմամբ: Ավելին, Շրջակա միջավայրի պաշտպանության գործակալության կողմից սահմանված ներկայիս անվտանգության չափանիշները հաշվի են առնում միայն առանձին նյութերը, այլ ոչ թե խառնուրդների կուտակային ազդեցությունը, որոնք մարդկանց մեծ մասը սպառում է։
Հետազոտողների կարծիքով, օրգանական սննդին անցնելը օրգանիզմում թունաքիմիկատների մակարդակը նվազեցնելու ամենահեշտ միջոցն է։
Թարգմանությունը՝ Euromedia24.com-ի
