Շատ լավ է, որ կառավարությունը նախատեսում է պարտադիր զինվորական ծառայության ժամկետը 1․5 տարի դարձնել, բայց բոլորիս համար պարզ է, որ այն լավ մշակված նախընտրական քայլ է։ Այս մասին ԱԺ–ում լրագրողների հետ զրույցում ասաց «Հայաստան» խմբակցության պատգամավոր Գեղամ Մանուկյանը։
«Երբ 10 ամիս առաջ Սուրեն Պապիկյանին ԱԺ–ում հիշեցրի, որ տարիներ առաջ խոսում էին զինված ուժերում ծառայութան ժամկետը կրճատելու մասին, և մինչև հիմա չեն իրականացրել դա, պաշտպանության նախարարն էն ժամանակ ասում էր՝ դե անվտանգային խնդիրներ կան։
Երկրորդ դրվագն էլ կա, որ այս ֆոնին Նիկոլ Փաշինյանի կեղծ թեզը, թե բա տեսեք՝ խաղաղություն–խաղաղություն, փորձում են նաև սրա մեջ տեղավորել»,– ասաց նա՝ նշելով, որ պատրաստվում է հարցում ուղղել պաշտպանության նախարարությանը, գլխավոր շտաբին։
«Նման լուրջ արմատական փոփոխության դեպքում պետք են լուրջ հիմնավորումներ, վերլուծություններ, դեմոգրաֆիական ստատիստիկա»,– հավելեց ընդդիմադիր պատգամավորը։
Ամեն դեպքում, Մանուկյանը չի բացառում, որ այս նախագիծը նույնպես կարող է «հեքիաթների ժանրից» լինել․ «Դեռ չշտապենք, քանի որ ԱԺ դեռ մուտք չի եղել։ Շատ կարևոր է կրճատումը, բայց կան խնդիրներ, որոնք պետք է ճշգրտվեն, հստակեցվեն, անորոշություններ չլինեն, և հաշվի առնվեն անվտանագային գործոնները»,– ասաց նա։
