Իսրայելը մտադիր չէ պահպանել Հարավային Լիբանանի օկուպացիան և կսկսի դուրս բերել իր զորքերը այն բանից հետո, երբ Լիբանանի կառավարությունը սկսի իրականացնել շիական «Հեզբոլլահ» շարժման զինաթափման ծրագիրը։
Այս մասին Բաաբդա պալատում կայացած մամուլի ասուլիսում հայտարարել է Մերձավոր Արևելքի հարցերով ԱՄՆ հատուկ ներկայացուցիչ Թոմ Բարաքը, որը բանակցություններ է վարել Հանրապետության նախագահ Ջոզեֆ Աունի հետ։
«Իսրայելը մեզ հաստատել է, որ իր զորքերը Հարավային Լիբանանից դուրս կբերի քայլ առ քայլ՝ կախված «Հեզբոլլահի» ստորաբաժանումների զինաթափման գործընթացի տեմպից», - ընդգծել է դիվանագետը։
Միաժամանակ, Բարաքը կոչ է արել Լիբանանի իշխանություններին արագ կարգավորել հարաբերությունները հրեական պետության հետ։
«Իսրայելի հետ խաղաղության համաձայնագիրը բարգավաճման ուղին է», - ասել է նա։
Ամերիկացի միջնորդի խոսքով՝ ԱՄՆ նախագահ Դոնալդ Թրամփը մտադիր է Պարսից ծոցի երկրներին ներգրավել Լիբանանի հարավում տնտեսական գոտի ստեղծելու գործում, ինչը «թույլ կտա վերականգնել պատերազմից վնասված տարածաշրջանը և այն վերածել ծաղկուն տարածաշրջանի»։
