Օրական յոթ ժամից պակաս քնելը մեծացնում է ութ հիվանդությունների զարգացման ռիսկը, այդ թվում՝ հիպերտոնիայի, սրտի կաթվածի, ինսուլտի, ճարպակալման, շաքարախտի, դեմենցիայի, դեպրեսիայի և տագնապային խանգարումների: Այս մասին Terra-ին ասել է նյարդաբան Ջանաինա Ազևեդո Սանտոս Պաչեկոն:
Մասնագետի խոսքով՝ քնի պակասը խաթարում է սթրեսի հորմոնների և նյութափոխանակության կարգավորումը, մեծացնում է բորբոքումն ու արյան ճնշումը, ինչպես նաև բացասաբար է անդրադառնում սրտանոթային համակարգի վրա: Նյութափոխանակության և ինսուլինի արտադրության խափանումը մեծացնում է ճարպակալման և շաքարախտի առաջացման ռիսկը:
Բացի այդ, քնի պակասը առաջացնում է նյարդային համակարգի քրոնիկ գերծանրաբեռնվածություն: Այն նպաստում է հոգեկան խանգարումների զարգացմանը, ինչպես նաև հիշողության և ուշադրության վատթարացմանը: Մասնագետը հավելել է, որ բավարար քուն չստացող մարդիկ բնութագրվում են քնկոտությամբ և դանդաղ ռեակցիաներով: Նման «արգելակումը» մեծացնում է ճանապարհատրանսպորտային պատահարների և աշխատանքային վթարների հավանականությունը:
Քնի որակը բարելավելու համար բժիշկը խորհուրդ է տալիս ամեն գիշեր նույն ժամին քնել, ննջասենյակը մութ պահել և երեկոյան խուսափել գաջեթներից:
Թարգմանությունը՝ Euromedia24.com-ի
