Իսրայելը գնահատում է, որ վերջին հարվածները Իրանի միջուկային ծրագիրը հետ են մղել առնվազն երկու-երեք տարով, ասել է Մոսկվայում հրեական պետության դեսպան Սիմոնա Գալպերինը։
«Մեր փորձագետների գնահատականը, ոչ միայն ռազմական, ցույց է տվել, որ միջուկային ծրագրին հասցված հարվածը շատ լուրջ է։ Մենք կարծում ենք, որ նրանց ծրագիրը հետ է շպրտվել առնվազն երկու կամ երեք տարով», - ասել է նա ճեպազրույցի ժամանակ։
Ատոմային էներգիայի միջազգային գործակալության (ԱԷՄԳ) գլխավոր տնօրեն Ռաֆայել Գրոսին նախկինում CBS հեռուստաալիքին ասել էր, որ Իրանը պահպանել է իր միջուկային ծրագրի որոշ բաղադրիչներ և կարող է վերսկսել ուրանի հարստացումը մի քանի ամսվա ընթացքում։
Նա ասել է, որ Իրանն ունեցել է և դեռևս ունի ուրանի վերամշակման, փոխակերպման և հարստացման որոշակի հզորություններ Ֆորդոյում, Նաթանզում և Սպահանում՝ հավելելով, որ այդ հզորությունները «մեծ մասամբ ոչնչացվել են», բայց «ինչ-որ բան մնում է»։
